NIISKOR si LeBron James og running one hander paghupas sa kataposang quarter aron sakwaton ang iyang Cleveland Cavaliers ngadto sa 105-103 nga daug kontra sa Toronto Raptors atol sa Game 3 sa ilang best-of-seven NBA eastern conference semifinal kagahapon.
Human matabla sa Toronto ang iskor sa 103-tanan pag-iskor ni OG Anunoby sa walo ka segundos nabilin, gisalig sa Cavaliers ang tanan kang James.
Nadawat ni James ang bola sa inbound pass, nidribol pa ug nisyat diin nabibo ang mga fans sa Cavaliers sulod sa ilang homecourt sa Quicken Loans Arena.
Nihuman si James og 38 puntos, samtang niabag si Kevin Love og 21 ug 16 rebounds. Nihatag sab si Kyle Korver og 18.
Giblangkohan sa Cavaliers karon ang Raptors sa ilang siryi nga 3-0 ug usa nalang ka daug ang Cleveland aron moabante sa National Basketball Association (NBA) eastern conference final.
Posible pa mahuman sa Cavs ang Game 4 diin matagamtaman nila ang homecourt advantage.
Sa pikas bahin, usa nalang ka daug ang Boston Celtics human giparot nila ang Philadelphia 76ers, 101-98, sa overtime.