NAPOSTI sa Subokin Expendables ang ilang ikaduhang daug agi pagpilde sa HNH Builders, 107-89, atol sa 1st St. Ignatius de Loyola Summer Basketball League 26-above niadtong Biyernes, Mayo 4, didto sa Xavier University Gymnasium.
Samtang, naangkon sa Stampede Ballers ang ilang unang daug agi sa 87-79 nga pagdaug kontra sa visiting team Tracy.
Nangulo si Oding Nagac alang sa Subokin ni Coach Rocky Calingin pinaagi sa pagbira og 27 puntos, samtang niabag sila Eph Dahilan ug Jawo Demecillo og 21 ug 18, sunodsunod.
Nakontrolar sa Expendables ang dula sa first quarter pa lang ug nimintinar pa nila ang distansyang labaw hangtod sa kataposan.
Nihuman si Chris Esquerra og 28 puntos aron mangulo sa Builders, samtang nihatag sab sila Seroy ug Engineer Rafols og 26 ug 12, sunodsunod.
Pabilin ang Builders nga walay daug sulod sa duha nila ka games sa double round robin nga liga.
Naunhan sa Tracy ang Stampede sa first quarter ug nakahawid pa og igong labaw paingon sa third quarter.
Apan, experyensya sa Ballers maoy nakapadala og gilas alang kanila sa katapusang fourth quarter.
Nagkumboya sila Karl Daigdigan ug Jimboy Custian aron sakwaton ang Stampede sa katapusang upat ka minutos.
Krusyal turnovers sab sa katapusang quarter maoy hinungdan sa ilang kapildihan.
Nihatag sab si Ronnel Cenabre og 19 puntos, samtang sila Waden Martinez ug Jayso Tagud niabag og 17 ug 13.