SI Jakesone Saludar sa Polomolok, South Cotabato nakahatud og nag-inusarang gold medal sa iyang lungsod sa bag-ong nahuman nga Philippine Sports Commission (PSC) Pacquiao Amateur Boxing Cup Mindanao Finals nga gihimo sa Davao City Recreation Center (Almendras Gym).
Si Saludar, 19, manghud ni Asian Games Gold Medalist Rey Saludar, miiskor sa unanimous decision victory kontra Ariel Almamento sa youth boys light flyweight 46-49 kilogram (kg) category, magdala kaniya padung sa national finals.
"Grabe gyud ang akoang training, sir. Mata og sayo tapos training na pod. Salig pod sa Ginoo," suma ni Saludar labot sa iyang preparasyon atol interview sa Sun.Star Davao.
Siya ang nag-inusara gikan sa Polomolok kinsa nisugakod hangtud finals amateur boxing event.
Iyang motibasyon mao ang pagkab-ot sa kalampusan sa iyang igsuon ug motigi sa nagkadaiyang lugar sa kalibutan samtang magrepresenta sa Pilipinas.
"Pangarap kaayo nako malampasan akoang kuya, sir, mao grabe gyud akoang paningkamot kay siya man sad naga-train ug nagatambag sa akoa nga ayuhon nako," matud ni Saludar.
Siya usab nadasig sa pagbansay sa boksing aron malikay siya sa bisyo ug makapadayon sa iyang pagtungha.
"Kami lang sa akoang kuya ang naga-boxing sa amoang pamilya, sir, mao kami sad nagatinabangay," dugang niya.
Siya naningkamot nga mahimong ilado nga boksidor sama sa iyang idolo nga si Manny Pacquiao ug iyang maguwang nga si Rey, ug mahimong makatigi sa Southeast Asian Games ug Asian Games.
Apan iyang damgo nga magdala sa bandila sa Pilipinas sa Olympics sa umaabot nga adlaw.
“Train hard lang gyud, sir, ug paningkamot lang gyud,” sulti ni Saludar kun unsaon niya pagkab-ot iyang damgo.