KANIADTO, ang pagpanglimpyo sa mga basura sa Cebu Business Park ang giatiman ni Earl Anthony Durano, 30.
Karon, mga kliyente na sa usa ka kompaniya og business process outsourcing (BPO) ang iyang giasikaso.
Kaniadto, sa kadalanan nimo siya makita taliwa sa naglagiting nga kainit sa adlaw, mosulod ug manglimpyo sa hugaw nga mga imburnal, manguha sa mga basura, laya nga mga dahon ug kahoy ug ibutang sa mga sako aron ihatag sa tigkolekta og basura o ikarga sa trak sa basurahan.
Karon, sa mabugnaw nga buhatan na makit-an si Earl, diin langyaw nga mga kliyente ang iyang katransaksyon matag adlaw.
Ang wala mahibaw-i sa ubang mga higala ni Earl, siya nagsugod isip usa ka metro aide sa CBP, siyudad sa Sugbo sud sa duha ka buwan, sa wala pa siya mahimong customer service representative o telephone banker sa JP Morgan Chase.
Siya nangalagad sa industriya sa BPO sud na sa kapin usa ka dekada sukad niadtong 2007.
Si Earl nipaambit nga nisud siya pagka metro aide human nigradwar sa high school aron dunay ikasuporta sa iyang pagtungha sa kolehiyo.
Gumikan sa iyang paningkamot, nadawat siya isip eskolar sa University of San Jose-Recoletos ubos sa programang Recoletos Educational Assistance for Deserving Students (Reads) ug nagtungha sa kursong Bachelor of Arts in English.
Apan niundang siya sa iyang scholarship human sa duha ka tuig.
Iya kining gibuhat, matod niya, kay niretiro na sa pagka security guard ang iyang amahan nga si Hilario ug isip maoy maguwang sa duha ka magsuon, siya ang nanginabuhi ug nibarog isip breadwinner sa ilang pamilya.
Gawas sa kalisod, laing hagit ang nasinati sa pamilya dihang namatay si Hilario niadtong Agusto 2016 sa panuigon nga 65, gumikan sa multiple organ failure.
Wala pa dinhi matapos ang pagsulay, kay niadtong Pebrero 28, 2018, gioperahan si Earl sa iyang wa’ng dughan gumikan sa nitubo nga bukol. Siya aduna usab siya’y slipped disc.
Sa sinugdanan, nahadlok si Earl nga dili makatiwas sa kolehiyo human siya operahi.
Apan siya nakahinumdom sa wala pa mabugtoi sa kinabuhi ang iyang amahan, iya kining gisaaran nga mo-graduate gyud siya sa kolehiyo ug modawat og diploma.
Human sa singko minutos, namatay ang iyang amahan.
Taliwa sa mga pagsulay ug hagit sa kinabuhi, napamatud-an ni Earl nga kon mag-ampo sa Ginuo, mosalig sa kaugalingon, magkugi ug maningkamot, makab-ot ang kalampusan nga iyang gipangandoy.
Niadtong Abril 28 ning tuiga, nigradwar si Earl sa kursong Business Administration pinaagi sa Expanded Tertiary Education Equivalency and Accreditation Program (ETEEAP) ug duna pa kini bonus. Siya nitapos isip ikaupat nga Outstanding Student sa ilang graduation sa USJ-R.
Atol sa seremonya sa graduation, si Earl nihilak kay siya nahibawo nga naa ang iyang amahan sa palibot, nagtan-aw sa iyang kalampusan.
Human sa graduation, iyang giduaw ang lubnganan sa iyang amahan sa Cabantan Cemetery, ning siyudad ug gihalad ang medalya nga iyang nadawat.
Karon, si Earl ang nagdumala sa negosyo sa ilang pamilya, ang pagpaabang og mga lawak.
“Usahay kapoyon ka labi na kon ikaw ra usa pero magtan-aw ka sa future sa imong family, maganahan ka sa imong gibuhat kay para na sa ilang future, laban lang,” pagdasig nga mensahe ni Earl alang sa uban nga adunay susama niya og kasinatian.