NASEGUNDAAN na sab sa Subokin Expendables og usa pa ka daug aron pabiling walay tatsa sa nagpadayon nga 1st St. Ignatius de Loyola Cup Summer Basketball League 26-above.
Kini, human giparot sa Subokin ang Arsenals, 77-68, niadtong Sabado sa Xavier University Gymnasium.
Nangulo na sab si Rhodelle Nagac alang sa Expendables agi pagpupo og 30 puntos, samtang niabag sab si Ephraim Dahilan og 11.
Naa kanunay si Nagac motubag sa matag rally sa Arsenals agi pagkumboya nila Norman Paul Ihalas ug Kenny Largo.
“Kompleto lang gyud kaayo ang Subokin sab, while Arsenals morag kulang pa ilang firepower. Pero hulat nato ang second round,” ingon ni commissioner Arvin Martinez.
Nitala sab si Ihalas og 14 aron mangulo sa Arsenals, samtang nihatag sab si Largo og 11.
Sa pikas bahin, natagamtaman sa Tracy-Talakag ang unang daug agi sa 110-69 nga kadaogan kontra HNH Builders.
Nibira si Waden Martinez og 23 puntos alang sa Tracy, samtang niabag sab sila JP Erram ug PO1 Ivan Quino.
Mao sab ni ang ikatulong sunod-sunod nga kapildehan sa Builders.