GIKASUHAN na sa kapulisan sa lungsod sa Kiblawan, Davao del Sur ang magsuong suspek nga maoy nagtabang pagpatay sa 18- anyos nga nidayo lamang didto sa lugar, bag-uhay lamang.
Kahinumduman nga gipatay si Jimboy Lasib, sakop sa netibong B'laan, minyo, ug taga Sitio Sultana, Barangay Donganpekong, Matanao, Davao del Sur, niadtong Enero 16, alas 10:45 sa gabii.
Subay sa taho sa kapulisan, nailhan nila ang mga suspek nga mao sila si Brahin ug Yoyong Linkanay, ug pulos molupyo sa Barangay Abnate, Kiblawan.
Nasuta sa imbestigasyon sa kapulisan nga karaang bangi tali sa suspek ug magsuon maoy niaghat kanila nga patyon ang biktima.
Human giayo pagsubay sa kapulisan ang motibo sa krimen nilutaw dayon ang identipikasyon sa mga suspek hinungdan nga gi-submitar na nila ngadto sa piskalya ang kaso niadtong Martes.
Apan, wa nitaho ang kapulisan kung anaa na ba sa ilang kustodiya ang mga suspek. Dondon Dinoy