ONSE ka mga samad dinunggaban ang naangkon sa usa ka drayber kinsa giluba sa wala mailhing mamumuno didto sa usa ka bakanteng luna sa Malindang Street, Central Park Subdivision, Bangkal, siyudad sa Davao niadtong Martes.

Si Police Officer 3 Dominandor Vitor, duty investigator sa Talomo Police Station, nag-ila sa biktima nga mao si Rodrigo Escoba, 23, ulitawo, nagpuyo sa Blk. 7, Lot 12, Phase 3, NHA Bangkal.

Matud ni Vitor sa iyang spot report nga ang biktima napalgan nga nagkadugo sa alas 9:00 sa buntag didto sa maong lugar ni Ramil Bergado, 30.

Si Bergado maoy nagpahibalo sa mga otoridad bahin sa iyang nakita mao nga miresponde ang mga sakop sa Talomo Police Station uban sang mga sakop sa Scene of the Crime Operatives (Soco).

Sigun sa makuting imbestigasyon, nasayran nga ang biktima dunay gimanehong motorsiklo sa wala pa siya namatay ug gidudahan nga gidala ang motorsiklo sa wala mailhing carnapper.

Si Vitor nagbutyag sa iyang investigation report nga dako ang posibilidad nga carnapping ang motibo sa mamumuno kinsa gawasnon hangtud karon gikan sa mga otoridad.

Ang patay'ng lawas sa biktima atua karon gihaya sa Collado Funeral Homes sa Bangkal.

Si Police Superintendent Rene Aspera, officer-in-charge sa Davao City Police Office, nagbutyag dihang gihinabi sa mga tigbalita nga iyang gimandoan ang kapulisan nga sulbaron sa labing daling panahon ang kaso.

Buot niyang masikop ang tawo nga nakaingon sa kamatayon sa biktima aron silotan sa sala nga nahimo.(AD)