NATANGTANG ang ngipon sa 8 anyos ug nagkadugo nga gidala sa balay tambalanan human nabanggaan sa motorsiklo kagahapon mga alas 9:00 sa buntag sa Punta, Macabalan ning siyudad sa Cagayan de Oro.

Giila ang biktima nga mao si Dhiem Olvena, 8, sa susamang dapit, samtang ang suspetsadong driver mao si Aljun Magbanua, hingkod ang edad silingan lamang sa biktima.

Si Magbanua ang personal nga midala niini sa balay tambalanan niadtong tungora human nahitabo ang insidente.

Gibutyag ni Magbanua sa Sun.Star Superbalita nga silingan niya kini apan kalit lang kining midagan ug gitabo ang iyang gimanehong motorsiklo hinungdan nga nabanggaan ug diriyot pa kining mabangga usab sa multicab nga miagi sa susamang dalan niadtong tungora.

Nidagan pa pauli sa puloy-anan ang biktima bisan nagkadugo ug natangtang na ang ngipon niini gumikan sa pagkabangga apan gilakag kini ni Magbanua ug gidala sa Northern Mindanao Medical Center aron nga matambalan.

Hinuon si Magbanua mipasalig sa galastuhon sa balay tambalanan ug wala niini gipasagdan labina nga silingan lamang ang biktima.

Samtang dali sab dayon nga giatiman sa mga doktor ang biktima kinsa padayon pang giobserbahan ug nagpabilin sa balay tambalanan ning panahona.(SVB)