GARCIA HERNANDEZ, Bohol — Nabanggaan ang otso anyos nga batang lalake sa usa ka traysikol dihang kalit kining milabang sa karsada sa may Poblacion, Garcia Hernandez niadtong Abril 7 sa hapon.
Ang biktima giila nga si Mark Christian Lade, residente sa dapit samtang ang suspek nga drayber sa traysikol giila nga si Victor Macuse nga residente usab sa nahisgutang dapit.
Sa pakisusi sa kapulisan, ang traysikol padung na unta sa lungsod sa Garcia Hernandez.
Dihang niabot na siya sa interseksyon padung sa Poblacion East dapit sa may Barangay Hall, kalit lang nga nilabang ang biktima ug didto aksidente nga nabanggaan ang batang lalaki.
Gidala gilayon ang bata sa hospital sa lungsod sa Jagna, Bohol aron kini matambalan.
Samtang ang drayber sa traysikol gidala sa estasyon sa kapulisan sa Garcia Hernandez alang sa imbestigasyon sa kasong iyang gikalambigitan. (LTB)