USA ang patay samtang pito ang nga nangaangol human aksidenteng nibangga ang sakyanan sa kurbada nga bahin niadtong Martes mga alas 11:00 sa gabii didto sa Barangay Anakan siyudad sa Gingoog.
Kargado sa mga utanon ug mga bulad ang Isuzu van nga nagdala og plaka CLB-699 nga gikan pa ning siyudad sa Cagayan de Oro dihang nawad-an og brake sa kurbada nga bahin.
Tungod niini ang driver nga mao si Gaspar Salazar, 28, lumad nga taga siyudad sa Surigao nihimo na lang pagbangga sa kilid nga bahin tungod sa kahadlok nga mahulog sa pangpang.
Si Senior Police Officer 2 Felix Espejon, traffic investigator sa Gingoog Police Station nibutyag sa Sun.Star Superbalita ngaÿadunay 17 ka mga sakay sa maong van niadtong tungora nga pulos mga negosyante og gulay nga igo lang nitungtong sa mga karga ug nitabon lamang og tent.
Wala masayod ang mga sakay sa likod nga bahin sa trak nga nawad-an na og brake ang ilang gisakyan hinungdan nga wala nakabantay dihang naligid sa kanal ang sakyanan.
Nabunal ang ulo ni Juviniano Muna, dihang nahulog gikan sa gisakyan ug paghidangat niini sa Gingoog District Hospital gideklarar sa doktor nga dead on arrival.
Laing pito ang mga nangaangol nga mao sila si Deofina Hinduyon, Oliver Bate, Robert Alimpulos, Napoleon Torres, Luzviminda Cabresos, kinsa talandugon ang kahimtang, Rommel Arocha ug Daylinda Sumocat, pulos mga molopyo sa siyudad sa Surigao.
Matud ni Espejon nga gipangdala na ang mga biktima sa siyudad sa Surigao human naareglo sa hingtungdan ang maong hitabo.
Gani pila ka oras sulod sa prisuhan sa Gingoog Police Station si Salazar apan tungod sa pasalig sa tag-iya sa sakyanan nga dili pasagdan ang galastuhon sa mga nabiktima nakagawas ra usab kini sa prisuhan.