GIAPROBAHAN sa House special committee on food security ang balaodnon nga nagmando sa mga food establishment sama sa restaurant, cafes, diners, fast food chain, hotel, supermarket ug culinary school, pag-donate sa ilang sobra nga pagkaon ngadto sa mga kabus.
Tumong sa maong balaodnon mao ang pagseguro nga mapalambo sa nasod ang insaktong paggamit sa atong resources ug kaminusan ang pag-usik-usik sa mga pagkaon, sa samang higayon matabangan usab kadtong nagkinahanglan ug gipanggutom.
Gipaniguro hinuon sa maong balaodnon nga kadto lamang luwas nga pagkaon – nagpasabot pwede pa ikonsumo, ang ipanghatag.
Dunay ipahamtang nga silot alang niadtong mobaligya sa mga sobra nga pagkaon nga gi-donate ngadto sa nagkinahanglan.
Kon mapatuman sa iyang insaktong katuyoan, daghang mga tawo ang mabulahan niining maong programa apan kon sudlan kini og tinunto daghan sab ang mahikawan sa kaayohan.
Alang sa mga supermarket, medyo lisod mapatuman ang balaod kay kutob sa mahimo ipaneguro nila nga mabaligya ilang produkto sama sa mga nilata ug mga naka-impake nga pagkaon, hangtod nga dili moabot sa iyang expiration date.
Hinuon, sama sa mga restaurant, cafes ug diners, ang supermarket dunay gitagalan mga pagkaon ug angay ikonsumo sa gitakdang adlaw aron dili maabtan sa iyang pagkalata o pagkapan-os o pagkadaot.
Ang dakong hagit sa gobiyerno niini mao unsaon nila pag-monitor ang tanang food establishment kon nagtuman ba kini sa balaod.
Bisan pa nia kanang balaod, makalingkawas gihapon kining mga food establishment tungod kay sila man ang modeterminar kon sobra o angay bang ipanghatag ilang pagkaon. Mas pabor pa tingali ang management sa food establishment nga ipang-apod-apod nalang ngadto sa ilang trabahanti isip dugang benepisyo.
Usahay gud kining mga polisiya sa gobiyerno inay makatabang makapig-ot hinuon sa operasiyon sa mga negosyanti.
Kon sal-otan og provision sa maong balaodnon nga hatagan og incentive sama sa tax credit basi sa presyo sa donasiyon, nan, segurado halos tanang food establishment mohangop niining programaha.
Kon ipataban kining tax credit dili na magproblema ang gobiyerno pag-monitor sa malapason sa balaod kay mismo kining mga food establishment mohimo og lakang aron makakuha og diskwento sa ilang buhis.
Apan, kon ugaling walay himuong kausaban sa maong balaodnon ug mapirmahan kini sa Presidenti, magpaabot ta og kaguliyang – una, dugang trabaho kini sa DSWD ug mga LGU pag-monitor- nagpasabot dugang mga kawani gikinahanglan aron mopadagan sa programa, ug labaw sa tanan dugang budget alang sa operasiyon.
Dili kini maoy konkreto nga solusiyon aron mapahimuslan ang naghinobra nga pagkaon sa mga food establishment ug mabahogan ang walay gipangkaon.
Usa lamang kini ka paagi nga makalingkawas sa iyang katungdanan ang gobiyerno paghaw-as unta sa kalisod sa mga tawo aron dili nato bahugan og sobra, apan mahatagan unta og insaktong kapanginabuhian aron makapalit sa ilang gusto nga pagkaon.
Subo lang kon atong mahibaw-an ang kamatuoran, kay sa ubang nasod kining mga sobra nga pagkaon gigahin lamang kini sa mga hayop o gamiton isip dugang fertilizer sa kaumahan, ang uban gani, diretso na sa basurahan.
Ngano man? Ang mga tawo didto wala magdependi sa salin gikan sa mga food establishment kay maka-afford man sila og palit tungod kay malamboon ang ekonomiya sa ilang nasod.