NILANDING si Jenefer Paloma sa ika-duhang pwesto atol sa Samal Marathon 2018 21K run women’s open niadtong Domingo sa Island Garden of Samal.
Wala magdahum ang 24-anyos nga Paloma nga molanding sa ingnana labina nga wala sa plano nga moseryuso siya sa Samal open.
Igo lang niya giubanan ang iyang mga estudyanteng marathoners nga ninglumba sa 42K, samtang siya sa 21K.
“Gusto man gud sila mag-experience sa mas taas nga dagan sa 42K,” ingon ni Paloma, kinsa usa ka teacher sa Misamis Oriental General Comprehensive High School.
Gidominar ni Judelyn Miranda, taga-Tagum City, ang 21K women’s open agi pag-oras og usa ka oras ug 30 minutos.
Nagsunod si Paloma sa usa ka oras ug 46 minutos, samtang si April Rose Curato sa Cotabato naa sa ikatulo nga nioras og usa ka oras ug 51 minutos.
Mao ni ang ika-duhang lumba ni Paloma gikan paghuman sa school year.
Mahinumduman nga nidaug sab siya sa ikaduhang pwesto sa Xterra Danao Asia Pacific Championship off-road triathlon Asian elite category niadtong Abril 22 didto sa Danao.
Dako iyang pasalamat sa iyang sponsor nga si Barangay 21 chairwoman Gilda Go.