NABAKUNAHAN na ang 37,705 ka mga iro ug iring nga gikan sa 23 ka mga barangay sa siyudad sa Sugbo sa Department of Veterinary Medicine and Fisheries (DVMF) sa ilang house-to-house “Alis-Rabies” operation karong tuiga.
Ang “Alis-Rabies” operation gidumala sa DVMF ug suportado sa Humane Society International (HSI) diin nag-target nga mamahimong rabies-free ang siyudad.
Naninguha sab ang DVMF nga mabakuhanan na sa di molapas karong Hulyo 30 ning tuiga ang 70 porsento sa 130,000 ka mga iro ug iring gikan sa 80 ka mga barangay sa siyudad sa Sugbo.
Apan suma pa sa pangu sa DVMF nga si Dr. Alice Utlang, ang operasyon kutob ra unta karong buwana, apan nihangyo siya sa direktor sa HSI nga i-extend sa Hulyo aron mahatagan og bakuna ang 80 ka mga barangay sa siyudad.
Dapatan sa DVMF ang mga iro ug iring sa kada barangay og libreng bakuna apan kon nagpabakuna na kini sa wala pay usa ka tuig, di na kini hatagan sa bakuna.
Kon niabot na kini og usa ka tuig, usban kini og bakuna.
Matod ni Utlang nga naglisod sila sa pagkuha nila sa ilang target.
“So far, okay man (ang operation) pero naay mga barangay nga dili gyod nato makuha atong target kay ang usa ka problema, ang guide pareha karon labi na hapit na ang eleksyon. Ang usa kay init sad kaayo unya mokalit lang og ulan. Ug naay usahay nga ang mga village ug subdivision dili pasulod. Og magpasulod gani, mga helper ra ang naa, nya dili sad magpasalig og pabakuna ang mga helper,” pasabot ni Utlang.
Sa ilang record, ang mga barangay nga nahatagan na sa bakuna karong tuiga mao ang Barangay Bacayan, Capitol Site, Pulangbato, Sambag 2, Apas, Bulacao, Babag, Quiot, Guadalupe, Sambag 1, Cogon Ramos, Zapatera, Mabolo, Luz, Sapangdaku, Buhisan, Toong, Duljo Fatima, San Antonio, Talamban, Busay, Pahina Central ug Lahug. (Kate F. Denolang, STC Intern)