PAGKAHUMAN namo og suroy-suroy anang gabii, usa na sab kami ka adlaw nga naglaroy-laroy sa mga tourist destinations sa Malaysia.
Una namong giadto ang iconic nga 451 meter-tall Petronas Twin Towers sa kasingkasing sa Kuala Lumpur, dayon mideretso kami sa Batu Caves usa ka limestone hill nga dunay daghang kuweba ug didto makita ang mga cave temples na anaa nahimutang sa Gombak, Selangor.
Didto sab makita ang world's tallest Hindu deity Lord Murugan statue nga anaa nahimutang sa Sri Maha Mariamman Temple Dhevasthanam.
Gilibot dayon namo ang Bentong, diin nanakay mi sa ilang Berhad Skyway cable car nga gidumala sa Resorts World nga gipanag-iyahan sa Genting Group.
Gilaag sab namo ang Malaysia's journey to enlightenment, sa Pahang, diin makita ang buhi nga kultura sa tinuohang Budismo sa ilang nasud.
Ug dihang gabii na, hinay-hinay naming milabigar sa Terminal Bersepadu Tasik-Selatan (TBS) ang terminal sa bus sa Kuala Lumpur kay padung na sab mi magkiat-kiat sa nasud Singapore.
Pahinumdom lang kung gusto ninyo'g sulit nga laag sama sa among gihimo, paghimo daan mog itinerary sa inyong laag kay gawas nga gaan nalang ang pagsubay niini, kini sab ang pangitaon sa immigration sa nasud kung asa mo mosulod.
Sa sunod Biyernes, i-share ko na pod kaninyo ang among laag sa Singapore, ang tipid nga pamaagi ug uban pang tips aron di mahubsan og budget.
Terima kasih Malaysia, sehingga masa depan, (Daghang salamat Malaysia, hangtud sa sunod higayon).