UGMANG adlawa dad-on nganhi sa Sugbo ang lawas sa Sugboanong si Press Secretary Cerge Remonde human siya namatay sa atake sa kasingkasing niadtong Martes sa buntag.

Ning higayona, ang iyang lawas anaa gipamutang sa Heritage Park, Taguig ug gikatakdang dad-on usab sa Malacañang Palace karong adlawa diin siya bilaran og usa ka gabii.

Click here for stories and updates on the Sinulog 2010 Festival.

Sa Biyernes sa buntag, kon way kausaban sa schedule, moabot ang iyang lawas dinhi sa mga alas 12 sa udto.

Sa di pa dad-on ang iyang haya sa Malacañang sa Sugbo, ihapit una siya sa buhatan sa Associated Labor Unions (ALU).

Usa ka misa ang ipahigayon sa kapilya sa ALU alang kang Remonde, kinsa sud sa dugay nga katuigan, nagsilbe sab sa mao nga labor union samtang nagduma sa samang higayon sa radio stations niini nga dyLA ug Smash FM.

Bilaran sab siyag usa ka gabii sa Malacañang sa Sugbo sa di pa siya dad-on unya sa Sabado ngadto sa Argao diin siya hayaon sa di pa ilubong.

Hayan sa Dominggo siya ilubong sa lungsod nga iyang natawhan. (JECT)