SA tinuod lang, sukad nakamatngon ko og buot murag subidahon ang pagdili sa pagkaon ining makatintal nga junk foods labi na kay makalaway ig makapawala kini sa uhaw tan-awon.
Maayo ang intensiyon ug katuyuan sa mga lokal nga magbabalaod, Department of Education (Dep Ed) ug administrador sa mga pampubliko ug pribadong mga tunghaan sa gipapasar nga ban ining mga softdrinks ug junk foods apan ang pangutana, mapugngan ba ang mga vendors sulod ug gawas sa mga eskwelahan sa pagbaligya ini kay kasagaran mao ra kini ilang panginabuhian?
Sa ordinansa nga gipapasar ni Provincial Board Member Christopher Baricuatro, iyang suhistiyon nga patas-an ang buhis sa mga baligyang softdrinks ug ubang tam-is nga pinakiti nga pagkaon.
Ang DepEd sab mipakanaog og sugo sa mga eskwelahan sa pagbaligya og mga pagkaon nga daghang sustansiya ug pagdili sa mga tinun-an pagpamalit bisag asa labi na gawas sa tunghaan sukad nahitabo ang pagpang-hilo sa mga estudyante didto sa Mabini, Bohol pipila ka tuig na ang milabay.
Para nako, mas maayo kung ang mga tunghaan modawat og mga concessionaires para daghang kapilian ang mga tinun-an nga swak sa ilang bulsa.
Labi pa gyong maayo kung mahatagan og puhunan ug magiyahan ang mga gagmay nga mamaligyaay og pagkaon daplin sa karsada ug gawas sa tunghaan og mga simpling putahi nga ipamaligya sama sa linung-ag nga saging, kamoting kahoy, anagon, maruya, linatikang kulo, pinaypay, puto-balanghoy, lemonsito juice, butong, lab-as nga prutas (pinya, manga, bayabas, watermelon), turon, lumpia, pansit, bihon, spaghetti, ug uban pang finger foods nga madali-dali apan way daghang asin ug preservatives.
Gawas nga di ma wad-an og kita ang mga manindahay, himsog sab ang mamalitay og layo sa mga sakit-sakit.
Hugot nga disiplina ug kooperasyon sa tanan ang gikinahanglan para makab-ot ang tinuoray nga tumong: ang paghatag og limpyo, presko, ug masustansiyang pagkaon aron himsog, abtik, kusgan ug utukan nga mga tinun-an.