USA ka dakong isda ang napalgang patay sa Villa Ernesto, Barangay Gusa, siyudad sa Cagayan de Oro.

Sa nahipos nga impormasyon, naila ang dakong isda nga usa ka babaeng Adult Dwarf Sperm Whale nga adunay katas-on nga 8.5 feet ug gibana-banang 300 kilogramo nga kabug-aton.

Nadiskobrehan ang maong isda pinaagi sa usa ka concerned citizen ug gitagaan kinig deretsong aksiyon sa Law Enforcement Group ug Fish Health Laboratory sa Bureau of Fishery and Aquatic Resources (BFAR)-Northern Mindanao.

Dakong posibilidad nga pagbangga sa seawall ug mga bato ang hinungdan sa mga samad nga naangkon niini.

Sa pakighinabi sa SunStar Superbalita kang Tantan Salde, information staff sa BFAR-Northern Mindanao, kaduha mibalik sa maong dapit ang maong isda.

"Nakita siya sa usa ka concerned citizen mga 11am gahapon ug gerespondihan kini. Gipapahulay sa siya kadyot kay stress man gyud siya. Then mga somewhere 3 to 3:30, ge-iskortan siya para ipabalik sa lawod. Then bandang mga 5pm, nibalik ang same whale sa same location," padayag ni Salde.

Nadiskobrehan usab nga ang dakong isda mao usab ang nabalita nga nakita sa usa ka beach resort sa Barangay Bonbon ning siyudad sa Cagayan de Oro adtong Mayo 8.

Matud sa BFAR, sa ikaduhang higayon nga mibalik ang isda, grabe na ang pangluya niini hangtod sa wala na nakaya ug nakabsan na kini sa kinabuhi pasado alas siete sa gabii.

Nagpahigayon na ang ahensya og usa ka otopsiya ug ipaadto kini sa Manila aron masuta ang kamatayon sa isda.

Mao kini ang ikaduhang kaso sa bulan sa Mayo nga dunay dakong isda nga napalgan diin usa niini sa Barangay Macabalan. (Franck Dick A. Rosete, Phinma-COC Intern)