SUPERBALITA CAGAYAN DE ORO

Talento: Barangay Elections 2018

HELLO, mga kahigalaan. Unsa dinha ang inyong kalingawan? Ako, nia nagbaktas-baktas sa kadalanan kay ningsalmot man akong paryente nga si Joan Navarrete pagka-barangay kagawad sa New Visayas, Panabo City mao in full force nangampanya ang among pamilya. Lahi ni siyang bayhana. Nigraduwar sa kursong sikolohiya, abtik, batan-on, ug cute sama nako ha ha ha!

Sa pagpangampanya, walay pugsanay ning akoa. Sa matag hatag nako'g handbill sa mga botante, higala- hangyo ra gayud akong tirada. Irespeto nato ang katungod sa matag usa nga mopili sa kandidato o kandidata nga "like" niya.

Sama kaniadto basta higayon sa eleksiyon, hastang daghanang buotan sa mga politiko ilabi na kining mga nagpapili, migo. Makabungog na gayud sa dunggan paminawon ang mga pulong nga, "sinsero, moserbisyo, buotan, daling duolon," ug uban pa kay wala kita nasayud kung kini natural ba nila nga kinaiya.

Sa mga nakalingkod ug nagpapili na pod og usab, nindot natong sutaon kung unsay ilang nahimo sa atong barangay sa nilabay'ng panahon kay basi'g gihimo ra og pamugas ang ilang posisyon. Lilia ang ilang komitiba nga gikuptan kung duna ba kiniy kabag-ohan o bisan gamay nga kalamboan. Kung wala- dili na seguro nato sila utro botohan, tama ba, inahan?

Naa pod baya koy mga higala nga Diniyos ug abtik sa pagserbisyo bah apan karon daw gulay na kay dala sa katiguwangon ug sakit, igsuon. Sa akong personal nga panghuna-huna, ihatag na seguro nato ang tsansa sa ubang mas bata-bata (young). Kung dili na kita katikang aron makapangampanya, awwww dili na gayud kita tinuod makapanerbisyo niana. Wala ko naghusga apan mitan-aw lamang sa reyalidad, higala. Ang mga masakiton, pagpahulay na kamo intawon aron dili makompromiso ang inyong paglawas, igsuon.

Purya buyag pod ning uban puwera panghinaway, ang ilang background kay mahitungod ra intawon sa ilang pamilya (ngalan sa mga anak, igsuon ug asawa), unsaon man namo kanang maong impormasyon, i-add sa facebook, igsuon? Among gipangitang mabasa ang inyong kapasidad moserbisyo ug kredibilidad sa inyong pagkatawo.

Matud pa sa akong nabatian ug nabasahan, adunay mga kandidato nga wala gani daw pulos sa ilang panimalay, ning apil pa gayud sa piniliay. Ang uban, mga anak ug paryente daan sa mga politiko mao dako kaayo ang posibilidad nga makakupot gayud og puwesto.

Anyway, gamay'ng kuti sa pagpili sa mga nagpapili seguro atong style pagkabotante aron dili mag-antus sa mga mapahimuslanon ang atong kabarangay, mare. Gawas sa pagkakuti, iagi nato kini sa pag ampo, pare, aron mahayagan ang atong salabutan, unya makapili kita kung kinsa gayud kadtong mga angayan.

Sa modaug- congratulations! Sa mga mapildi- move on lang gayud ta ani. Usbon ko, matikasan o tinuod nga pildi ang atong pagdagan, adunay Diyos nga saksi sa tanan. Ang manikas, magabaan, ang nagtinarong- mapanalanginan dili man puwesto sa barangay apan eksperyensiya, kaalam ug paghinigalaay kay napulo pod baya ka adlaw kita nakighimamat sa atong mga kabarangay! #votewisely!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph