8,000 bantay sa eleksyon

MOKABAT sa 8,000 ka mga security forces gikan sa nagkadaiyang law enforcement units ipakatag sa tibuok Davao region aron panegurohon nga walay mahitabo nga kagubot sa Barangay and Sangguniang Kabataan (SK) elections karong Lunes.

Mga law enforcement agencies naglakip sa Philippine National Police (PNP), Armed Forces of the Philippines (AFP), Philippine Coast Guard (PCG), Bureau of Fire Protection (BFP) ug uban ang opisyal nga gideploy kagahapon atol sa sendoff ceremony sa Police Regional Office (PRO) 11 ground, Camp Quintin Merecido, Buhangin, Davao City.

Sa iyang mensahe, si PRO 11 regional director Police Chief Superintendent Manuel Gaerlan nag-abiso nga ang uniformed personnel nga makigkoordinar sa matag usa aron epektibo nga mahatud ang ilang misyon sa matinud-anon, limpyo ug luwas nga eleksyon ug segurohon ang kaluwasan sa mga botante.

“We hope to achieve zero incidents up to the last canvassing of votes; up to the delivery of all election results, and until all security and safety personnel shall be pulled out from their respective places of operations where they perform their duties in accordance with our laws and constitution,” suma niya.

Base sa ilang datos, alang sa PRO 11 lamang, ang ihap sa personahe nga ipakatag sa SKBE 2018 sugod Mayo 11 ngadto Mayo 16 naa sa 2,387.

Dunay 415 ka mga pulis ang ibutang sa election watch list areas (Ewas) samtang 1,971 ang maniid sa wa mailawom sa Ewas.

Dunay 1,162 ka mga barangay sa Region 11 ug 251 niini ilawom sa Ewas. Duna usay 1,438 voting centers ug 328 niini ilawom sa Ewas.

Gipahimangnoan sab ni Gaerlan ang mga personahe nga magpabilin nga non-partisan ug di modawat og saburno sa politiko.

Sa laing bahin, si 10th Infantry Division (ID) commander Major General Noel Clement nagtumbok sa importansya sa papel sa mga uniformed personnel alang sa kalampusan sa eleksyon.