USA ka pribadong abogado sa siyudad sa Davao ang nagsulti nga angay unta nga gihatagan og oportunidad nga madepensahan ni Supreme Court Chief Justice Maria Lourdes Sereno ang kaugalingon sa impeachment court.
"Though expected based on prior information in the grapevine, still very disappointed.
CJ Sereno should have been given the opportunity to defend herself through the proper forum, which is the impeachment court. That could have also afforded the public opportunity to know the allegations and defenses," sulti ni Atty. Danilo A. Balucos, kinsa nagsuwat sa SuperBalita ug magtutudlo sa pribado ug publikong unibersidad sa siyudad.
Ang pahayag ni Balucos miguwa dihang gipangutana kung usa ang iyang reaksyon human ang Korte Suprema miboto 8-6 kagahapon, Mayo 11, aron palagputon si Sereno.
Si Balucos nagsulti nga tungod kay nahitabo na kini, mas maayo nga dawaton nalang sa tanan.
"But perhaps the better thing to do now is for us to accept it and let the parties avail of legal remedies, if any," suma ni Balucos.
Sa makasaysayan nga desisyon, ang pinakataas nga korte sa nasud mipabor sa quo warranto petition ni Solicitor General Jose Calida aron i-inbalidar ang appointment ni Sereno isip chief justice.
Ang desisyon ipahamtang dayon, suma ni SC spokesperson Theodore Te.
"Maria Lourdes Sereno is found disqualified from and is hereby adjudged guilty of unlawfully holding and exercising the office of the Chief Justice," suma sa desisyon.
Ang mga mahistrado kinsa miboto pabor sa petition mao sila Diosdado Peralta, Francis Jardeleza, Lucas Bersamin, Andres Reyes, Noel Tijam, Samuel Martires, Alexander Gesmundo, ug Teresita Leonardo-De Castro.
Kadtong supak niini mao sila acting Chief Justice Antonio Carpio ug Associate Justices Marvic Leonen, Alfredo Benjamin Caguioa, Mariano del Castillo, Presbitero Velasco Jr., ug Estela Bernabe.
Sa samang higayon, ang korte nagmando sa Judicial and Bar Council (JBC) nga ablihan ang nominasyon alang sa Chief Justice.
Si Te nagkanayon nga si Sereno gimandoan nga motubag sud sa 10 ka adlaw gikan sa pagdawat sa mando nganong di siya pahamtangan sa paglapas sa Code of Professional Responsibility ug Code of Judicial Conduct sa paglapas sa sub judice rule ug pagsabwag sa insulto ug di maayong motibo ngadto sa mga miyembro sa Korte Suprema.
Sa pangutana kon ang quo warranto maoy hustong remedyo sa pagpalagpot sa Chief Justice, si Te nagsulti ang SC miboto 9-5.
Kadtong nagsulti pabor mao sila Velasco, De Castro, Peralta, Bersamin, Jardeleza, Martires, Tijam, Reyes Jr. ug Gesmundo.
Si Carpio, Del Castillo, Perlas Bernabe, Leonen ug Caguioa miboto nga dili.
Siyam ka mga mahistrado usab ang mipadayag sa ilang opinyon kon si Sereno milapas sa Constitution sa kapakyas nga ipasa iyang Statement of Assets, Liabilities and Networth (SALN), dugang ni Te.
Ang quo warranto petition nagtumbok sa kapakyas ni Sereno sa pagpasa sa iyang SALN isip pagtuman sa rekisitos sa JBC dihang siya miaplay sa maong posisyon sa 2012.
Ang mando gipaguwa usa ka buwan human ang korte nagdungog niadtong Abril 10 sa oral arguments sa petisyon samtang ang sesyon gihimo sa Baguio City.
Tungod niini nga desisyon, ang House of Representatives gilauman nga magtapos sa ilang impeachment proceedings batok Sereno.
Si House Speaker Pantaleon Alvarez unang nagsulti nga wa na sila'y i-impeach kon ang korte mopabor sa quo warranto petition.
Ang House justice committee, nga naglusad sa impeachment proceedings, nagprepara na sa articles of impeachment ug ilang committee report batok Sereno.
Kini nagpaabot sa pag-aproba sa plenaryo alang sa endorsement ngadto sa Senado alang sa pagdungog.
Ang Kongreso moboto sa articles of impeachment kon mobalik na ang sesyon karong Mayo 15. (SunStar Philippines)