PIPILA ka mga semana ang nakalabay, ni-chat sa akoa ang akong higala sa Cebu City Hall nga si Lito Vasquez. Nangutana siya nako kon interesado ba ko sa Sugbo Bike Lanes Board. Kay adbokasiya nako, nitangdo ko, pero wa pa ko ni-commit tungod kay nag-amping na ko human sa pipila ka katuigan nga pagsalmot namo sa pagduso sa pagbutang og bike lanes sa piniling mga karsada sa Cebu City, wa kini gidulngan.
Ang among grupo, uban sa mga urban bike riding community, pinangulohan sa magsuong Joel ug Edna Lee, kinsa nagduso sa bike lanes nagtuon ani. Gani, nigasto pa sila og kaugalingong kwarta aron matun-an asa nga mga karsada ang angay butangan og sharrow, usa ka matang sa bike lane.
Basin gipul-an na ang magsuong Lee, sama nako, kay wa na ko makadungog kabahin sa board.
Kinsa may di masagmuyo kon ilang nakita nga way gipadulngan ang tanan nilang kahago? Pulos ra estorya? Pulos ra mga photo opportunity?
In fairness kang Lito, sa akong pagkaila niya, naa siya sa samang adbokasiya. Apan malisod kon taliwa sa kalasangan, ang iyang tingog nag-inusara lang. Bisan tingali kon siya abagan, kon ang mga hari sa kagamhanan kutob ra sa pagpagilok og mga estorya, wa gihapon kini padulngan.
Mao na nga ako, kay naa usab sa ikaupat nga estate nga mao ang media, nag-amping. Kagahapon, dunay gipatawag nga tigom alang sa bikers, aron pagpili og mga representante. Wa ko mosanong. Hangtod nga ang magsuong Lee di mabalik, di una ko mo-commit.
Gisubay
Nahinumdom pa ko nga pipila ka mga tuig ang nakalabay, among gisubay nila ni Tony Dimataga, uban si kanhi konsehal Nida Cabrera, ang dan gikan sa North Reclamation Area padung sa Busay, nga giplanohang maoy unahon sa pagbutang og sharrow. Apan human niadto wa gihapoy nahitabo.
Mas maayo pa sila si Tony ug kaubanan, nakaugbok pa og signages padung sa Busay, alang sa mga motorista ug bikers. And imagine, ila ning kaugalingon nga kwarta ang ilang gigasto, for the love of biking.
Kaugalingong bulsa
Mao usab ni ang gibuhat sa magsuong Lee. Ilang gisubay ang mga karsada sa Cebu City nga mahimong mabutangan og bike lanes. Ilang kwarta ang gigasto niini, way bisan usa nga gikan sa gobyerno.
Ang ilang pagtuon ilang giduso sa pipila ka mga opisyal sa Siyudad, apan ingon sa wa gihapoy gipadulngan. Busa, kinsa man kaha nga grupo ang madasig sa pag-apil na usab? Hinaut pa nga ning higayuna, makakita na mig kahayag alang sa pagbutang og bike lanes sa kadalanan sa Cebu City.
Hangtod karon, kangitngit pa gihapon ang anaa naghuwat sa unahan.