NAKAPILI na kita og mga opisyal sa barangay niadtong Lunes, Mayo 14. Pinaagi sa tinarong o gahom sa kuwarta. Bisan naapektohan o nasakitan kita sa miaging mainit nga kampnaya sa eleksiyon apan, kinahanglang mo-move na kita gikan sa grabeng pamulitika ngadto sa kahiusahan alang sa kalamboan sa barangay. Labaw sa tanan, padayon natong bantayan ang lihok sa mga opisyal tungod sa posibling pagbalik sa korapsiyon aron pagpamawi sa pipila ka mga opisyal nga ningdaut pinaagi sa pagpamalit sa boto.
Gikompirmar sa Parish Pastoral Council for Responsible Voting (PPCRV) kagahapon nga ang barangay and Sangguniang Kabataan (SK) elections sa “kinatibuk-an malinawon” taliwala sa mga taho bahin sa halapad nga pagpamalit og boto ug mga bayolenting hitabo sa pipila ka dapit sa nasod. Sumala sa PPCRV, ang palit sa boto giingong P500 ngadto sa P5,000. Apan gikataho nga dinhi sa Sugbo ang pinalitay naa sa labing ubos nga P20 sa pagka konsehal?
Si PPCRV chairperson Rene Sarmiento nidayeg sa paningkamot sa Commission on Elections (Comelec), kapulisan, Department of the Interior and Local Government (DILG), Department of Education (DepEd), ug ubang ahensiya nga naghimo sa eleksiyon sa 2018 barangay ug SK elections nga malampusyon. Lakip sa atong pasalamatan mao ang katawhan nga nagpatunhay sa kahusay ug kalinaw, bisan seguro dunay dakong parte kanila ang nadani sa silaw sa kuwarta. Dili nato mabasol ang mga kabus.
Timan-i, ang atong pagpakabana dili kutob lang sa eleksiyon. Aktibo kitang makighiusa alang sa kalamboan sa barangay o nasod ug dili mahadlok nga mosanta sa mga dautang nga lihok sa mga opisyal, sama sa pag-abuso sa pundo sa kagamhanan. Ang barangay maoy pundasyon isip labing ubos nga ang-ang o organisasyon sa gambalay sa kagamhanan o nasod.