SECTIONS
Friday August 17, 2018
SUPERBALITA DAVAO

Kapitan gituyo'g patay?

NAGPAHUNGAW sa iyang kasubo ang asawa ni Kapitan Antonio Guatno sa Barangay Pangyan, Calinan District, Davao City nga napatay sa kapulisan human giingong misukol atol sa operasyon niadtong Dominggo, Mayo 13.

Ang asawa nga si Lenlen Caminade Guatno nagpadangat sa iyang kasubo pinaagi sa iyang Facebook account diin iyang gisaysay ang dagan sa hitabo dihang miabot ang kapulisan nga mipatuman sa search warrant.

"Nakita nako giguyod nila akong bana padulong sa kusina... dili na siya makita kay nasalipdan na siya sa bongbong. Nadunggan nalang namo ang another 5 gunshots," saysay sa asawa.

Dugang pa, "Nisyagit akong anak, "GIPATAY NILA SI PAPA MA." Niaksyon siya'g tindog kay adtuon n'ya iyang papa pero gipatiran siya ug giposasan," ni Lenlen kinsa nasagmuyo sa hitabo sanglit walay pusil ang iyang bana.

Gipasabot sab sa asawa nga walay laing tumong ang iyang pag-post sa Facebook kundi ang pagpaklaro nga wala mibalibad iyang bana sa pagpatuman sa search warrant sa kapulisan ug walay giingon nga armed confrontation sa maong hitabo.

"Kaya pa ba nimo mosukol kung daghan na kaayo og baril nakatutok sa imo? Isa pa forced entry ila gihimo kay guba kaayo ang among purtahan," dugang pagsaysay sa asawa.

Nanghinaut nalang ang asawa nga mahatagan og hustisya ang kamatayon sa iyang bana kinsa nagpasalamat sab kini sa tanang suporta sa katawhan sa Barangay Pangyan.

Sa kabahin sa kapulisan, gibutyag ni Davao City Police Office (DCPO) Senior Superintendent Alexander Tagum nga positibo nga nalambigit si Guatno sa ilegal nga druga kinsa mitahan na kini sa kapulisan.

Giingon sab sa kapulisan nga ilang gipahigayon ang search warrant dungan

sa impormasyon nga giingong protektor sab si Guatno sa kalihukan sa rebeldeng New People's Army (NPA) sa ilang dapit.

Gitin-aw sa kapulisan nga pulos mga bug-at nga alegasyon ang mga giingon sa asawa ni Guatno ug wala kini kamatuoran apan bugtong magpamatuod niini mao ang higayon nga misurender si Guatno sa otoridad aron limpiyohon ang pangalan sa giingong kalambigitan sa druga.


VIEW COMMENTS