2 samdan sa engkwentro

MOABOT 14 ka mga armadong tawo ang naengkwentro sa mga sakop sa 47th Infantry Battalion (IB) sa hilit nga dapit sa Barangay Campagao, lungsod sa Bilar, Bohol kagahapon sa kaadlawon diin duha sa mga sundawo ug usa ka tawo ang samdan.

Pasado alas 3 sa kaadlawon nakadawat og kasayoran ang mga sakop sa 47th IB nga adunay armadong mga tawo nga nasigpatan sa barangay.

Ang mga sundawo gipadala sa lungsod aron moabag sa pagbantay sa barangay ug Sangguniang Kabataan elections.

Apan sa ilang pagpamauli sa ilang kampo, gipahibawo sila sa mga residente nga nakakita sa mga armado kalalakin-an nga maoy hinungdan nga dali nilang gisusi.

Pasado alas 5 sa kaadlawon dinhi na nagsugod ang piniusilay nga milanat sa 30 minutos tali sa mga sundawo ug mga armadong grupo.

Duha ka mga sundawo ang nangasamdan.

Si Corporal Joel Campillanos nga natapsingan sa aping samtang naigo usab sa tudlo si Private First Class Kenneth Vallota.

Samdan usab ang sibilyan nga si Domingo Omac, 33, taga Purok 3, Sityo Cainso, Barangay Dagohoy, Pilar, Bohol.

Gidala siya sa Celestino Gallares Memorial Hospital sa Tagbilaran City.

Human sa buto-buto, ang armadong lalake daling namiya sa dapit diin nahabilin pa ang magazine sa AK47 nga kalibre sa armas ug usa ka Uzi nga dunay duha ka magazines, usa niini puno pa sa bala.

Matod ni Brigadier General Francisco Delfin, assistant commander sa 3rd Infantry Battalion, nga di pa nila maseguro kon unsa kini nga grupo o mga sakop ba sa New Peoples Army nga naglihok sa mga bukirang barangay sa lalawigan sa Bohol.

Sa pagkakaron, wa pa mohunong ang Philippine Army sa ilang manhunt operation ug wa pa usab matino kon aduna bay nasamdam o nakalas sa habig sa mga criminal.

“So far, wala pang report na may casualties sa kabila. Yun, nga we are still pursuing yung armed group na na encounter nila, wala ring report na casualty sa civilian,” matod ni Delfin.

Nagpadala og video ang usa ka residente sa Barangay Campagao diin madungog ang sunod-sunod nga buto sa armas.

Matod sa usa nag-video nga di magpaila sa kahadlok nga balikan sa mga armadong grupo nga nakurat sila samtang nahinanok sa pagkatug sa mga sipang bito sa armas.

Nagtuo sila nga adunay na engkwentro ang mga pulis nga goons sa usa ka kandidato, apan natingala sila nga milanat kinig kapin na sa 20 minutos.

Maklaro sa tingog sa video nga duol ra sa kabalayan ang engkwentro tungod sa tingog usab sa bala nga moagi sa ilang duol nga daw sa mohadyong kini.

“Nakuyawan mi sir oy kay duol na kaayo sa among balay, ubos anang video nga imong makita, unahan ana diha sila nag pinusilay. Ambot kon NPA ba to ilang kontra,” matod sa usa sa mga residente.

Tungod sa hitabo, si Police Regional Office (PR0) 7 director Robert Quenery mimando sa Provincial Director sa Bohol PNP nga moabag sa kasundalohan sa pagbantay.

Matod ni Quenery nga molusad silag halapad nga check point aron di makagawas sa lalawigan sa Bohol ang mga armado ug mohimog imbestigasyon kon asa kini nahisakop nga grupo.

Usa sa mga kasaligang tinub-an nitug-an sa Superbalita Cebu nga mga NPA ang naengkwentro sa mga sundawo nga gikan sa probinsya sa Negros Occidental nga malampuson nga misud sa Bohol.

Tinguha sa grupo nga mabalik ang ilang pwersa sa lalawigan human giila nga insurgency-free ang tibuok probinsya. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph