SECTIONS
Tuesday July 17, 2018
SUPERBALITA CEBU

Honorarium gilihok na

MAAYONG balita alang sa mga magtudtudlo nga nagsilbi isip Board of Election Tellers (BET) sa milabayng piniliay sa dakbayan sa Mandaue, madawat na ang inyong honorarium karong semanaha.

Kini maoy gipaambit ni Assistat Election Officer Jacqueline Reuyan dihang nahinabi sa mga tigbalita kagahapon sa udto.

Kagahapon sa buntag, nahimong busy na ang buhatan sa Comission on Elections (Comelec)-Mandaue sa pagtrabaho sa mga gikinahanglanon aron ma-release dayon ang honorarium sa 1,671 ka mga magtutdlo nga nagsilbi atol sa piniliay.

Mga alas 2 sa hapon hangtod alas 6 sa hapon kagahapon, gipaninguha sa Comelec-Mandaue nga ma-release na ang mga cash card sa mga magtutudlo gikan sa Brgy. Alang-Alang, Bakilid, Banilad ug Basak.

Sumala ni Reuyan nga mga tag-upat ka mga barangay ilang hatagan sa honorarium matag adlaw.

Gawas niini, himuon sab nga alphabetical ang pagpili sa barangay nga releasan sa cash card matag adlaw.

“Maayong balita ninyo (mga magtutudlo) kay inyong kahago, ma-paid off na mo ron. Mao ni among gi-prepare karon kay until pag election day, naa pay mga changes sa mg ani-serve wa pa namo ma-final ang payroll. As of now, nag work out na mi sa payroll, nag-check na mi sa cash card kay naa naman gyud ni,” matod ni Reuyan.

Ang mga poll clerk ug 3rd member makadawat ug tag P6,000, ang chairman P7,000 samtang P5,000 sab ang madawat sa supervising principal ug P3,000 alang sa support staff.

Recount?

Sa laing bahin, human madawat sa Comelec ang resulta sa tanang mga naproklamar nga mananaug sa Barangay ug SK elections, diin sagad mga incumbent ug last termer ang nidaug, si Reuyan niingon nga nakadawat sila og tawag gikan sa duha ka kandidato gikan sa Brgy. Basak ug Tabok ug nangutana unsaon pag-file sa pagpa-recount sa mga boto.

Gawas niini, wa nay laing nadawat pa ang Comelec og reklamo nga nikwestiyon sa resulta sa piniliay. (JPP)


VIEW COMMENTS