UNSA ba gyud ang drama aning John Lloyd Cruz ug Ellen Adarna?Di magpakita kon unsay ilang kahimtang, way pamahayag kalabot sa ilang estado, di mohatag og interbyu sa showbiz.
Wa man lang mangayog pasaylo sa bata nga giingong gi-bully ni Ellen sa cyberspace tungod sa pagduda nga nag-paparazzi kini ngadto kanila samtang diha sulod sa kan-anan.
Nahinumdom lang ko niadtong kanta ug pelikula sa una nga nag-ulohan “Kung Ayaw Mo, Huwag Mo”.
Mao diay nay ilang gusto? Bahala mo! Pasagda-i uy!
* * *
Nakaulan gyud intawn diri sa lugar sa mga tuki o butanding niadtong Martes sa gabii. Nabugnawan ang palibot ug maimadyin nako nga nalipay ang mga tanom. Magsugod na ba ang ting-ulan? Hulmigas! Wa pa ra ba ko makaligo sa dagat bisan kausa karong tuiga. Di kompleto ang istorya sa ting-init!
Bitaw, bisan nindot kaayo ang dagat diri sa Oslob ug mga silingang dapit, nagpanagana ko pagkaligo tungod sa daghang katol. Matud sa katigulangan, karong panahona nga linaw kaayo ang dagat ug mokalit lang pagbundak ang ulan, molugwa ang mga katol nga kalagmitan binuhatan sa mga bokya o jellyfish.
Mao nga bisan morag nagpangamay ang dagat, dedma lang gyud una.
* * *
Basta ting-init, mogawas gyud nang tambag sa Metro Cebu Water District nga kabo ang gamiton kon maligo imbes shower. Pero kon ang Barangays of Oslob Water & Sanitation Services Cooperative (Bowssco) ang pasultihon, ‘gamit og shower.’Kon tan-awon gyud og maayo, mas dali mabasa ang lawas kon shower ang gamiton labina kon kanang gitawag og handheld o telephone type ang shower head nga ikadul-it gyud sa parte sa lawas nga gustong bas-on.
Kon kabo god ang gamiton labina kon tugnaw sa sayong buntag, lagmit ikalit lang og yabo ang tubig ug mas daghan ang moderetso sa salog kaysa modapat sa lawas. Karon, asa man ang mas makadaginot sa tubig?
* * *
“Kasal” maoy title sa pelikula nga gibidahan nila ni Bea Alonzo, Derek Ramsay ug Paulo Avelino ug sa katapusan nihatag na gyud ang Star Cinema og ulohan sa pelikula nga di kinuha sa ulohan sa kanta.
Pero usa ra sad gyud ka pulong. Basta! Hapit na man god ang bulan sa kasal mao tingali nga mao nay gihatag nga ulohan.
Sa mga artista, wa koy ikasaway kay pulos maayo moarte base sa ilang nangaging mga proyekto. Hinoon, motan-aw pa ko ani kon unsa gyud kanindot ang istorya ug kon haum ba kini sa dagan sa panahon.
* * *
Lima ka indie movies ang akong natan-aw ning nilabay nga duha ka semana. Kini mao ang Kalayaan (Zanjoe Marudo, Luis Alandy), Kasunduan (Ejay Falcon, Joem Bascon, Joey Marquez), I America (Bela Padilla), Fallback (Zanjoe, Rhian Ramos) ug Birdshot (nalimot ko sa mga bida).
Ning lima giganahan kog maayo sa Fallback mangita na sab kog kopya sa laing mga indie movies. Makalingaw.