SECTIONS
Monday July 23, 2018
SUPERBALITA CEBU

3 ka anggulo gisubay sa pagrakrak sa pamilyang Loot sa Daanbantayan

Misusi. Ang kapulisan sa Daanbantayan uban sa mga opisyal gikan sa lalawigan ug rehiyon ningsusi sa dapit diin nahitabo ang pagpangrakrak sa pamilya ni Mayor Vicente Loot sa New Maya Port sa naasoy nga lungsod niadtong bespiras sa barangay elections. (Allan Cuizon)

TULO ka mga anggulo ang gitan-aw sa National Bureau of Investigation sa Central Visayas sa imbestigasyon labot sa pagrapido kang Daanbantayan Mayor Vicente Loot ug pamilya samtang luwan og pumpboat sa New Port sa Barangay Maya sa samang lungsod niadtong Mayo 13.

Ang mga sakop sa NBI 7 nagsugod na sa ilang imbestigasyon subay sa kamandoan sa ilang ulohang buhatan.

Si NBI 7 Director Patricio Bernales Jr. nibutyag nga dunay tag-as nga mga opisyal ang nanawag ug nihangyo nga imbestigahon ang nahitabo sa pamilyang Loot.

Sumala niini, apil sa ilang gitan-aw nga anggulo ang trabaho sa mayor isip usa ka pulitiko ug ang iyang trabaho sa una isip usa ka pulis sa wala pa kini mosud sa pulitika.

Gitan-aw usab nila ang posibilidad nga dunay nasuko o nagdumot sa mayor.

Matod niya, ang Philippine Drug Enforcement Agency (PDEA) na ang mosusi kon may kalambigitan ba sa gidili nga drugas ang maong insidente.

Ang mayor ang usa sa ginganlan ni Presidente Rodrigo Duterte nga giingong drug protector.

Ang mga imbestigador sa NBI 7 niadto na sa Daanbantayan niadtong Mayo 15 diin nahinabi na si Vicente ug didto na usab sila gikan sa crime scene.

“So far wala pa gyud tay na-gather nga tawo nga makasulti nga kaila sa perpetrators,” pagtug-an ni Bernales dihang nahinabi sa mga tigbalita kagahapon.

Siya niangkon nga mas advance na ang imbestigasyon sa kapulisan kon itandi sa ilang imbestigasyon ug andam sila makig-alayon sa pakisusi aron pag-ila sa naghimo sa krimen.

“Seguro mas advance ang investigation sa pulis kay gawas nga daghan sila, naa sad silay pulis didto. Kung naa tay makuha nga ebidensiya, we will be sharing the evidence to them o unsa man atong makuha,” dugang niya. (SCG)


VIEW COMMENTS