DAVAO CITY - Mga otoridad nagronda sa usa ka security agency nga gipanagiyahan sa paryente sa mga Ampatuan Huwebes sa buntag.
Nakompiska sa mga otoridad ang 50 ka mga nakalain-laing matang sa mga armas nga gipanag-iyahan sa Banderas Security Agency nga gipanag-iyahan sab ni Mussolini Lidasan.
Si Police Regional Office XI director Chief Superintendent Pedro Tango, nagbutyag nga gironda sa Special Task Group Against Partisan Armed Group nga gipangulohan ni Superintendent Vicente Danao ang maong security agency sa alas 5:30 sa buntag.
Mga otoridad mironda sa maong security agency pinaagi sa gahum sa search warrant number 1328 nga gipaguwa ni Judge Isaac Robillo Jr. sa Regional Trial Court (RTC) Branch 11.
Nakuha gikan sa balay ni Lidasan ang 24 ka .38 kalibre nga rebolber, 19 ka mga shotguns, duha ka .45 kalibre nga pistola, usa ka 380 nga pistola, tulo ka M16 rifle, usa ka M16 fragmentation granade, usa ka baton sword, 300 rounds sa mga bala sa M16 rifle.
Si Talomo Police Station commander, Chief Inspector Joselito Loriza mibutyag nga si Lidasan igsuon ni Bai Farida Ampatuan, Bise Mayor sa Matanog, Maguindanao.
Ang bise mayor, suma ni Loriza, asawa ni Department of Energy Undersecretary Zamzamin Ampatuan nga ig-agaw ni Datu Andal Ampatuan Jr.
Apan si Lidasan nagsulti sa mga sakop sa media nga ang mga armas gipanag-iyahan sa iyang security agency ug dili kabahin
sa gidudahang armas sa mga Ampatuan.
Dihang gironda ang maong security agency, usa ka sundalo nga na naila nga si Sergeant Alberto Antisoda Duhig sa 67th Infantry Battalion ang nasikop sa kapulisan human napakyas sa pagpakita og dokumento gikan sa Commission on Elections nga siya gitugotan nga magserbisyo isip detailed security sa maong lugar.
Si Lidasan, Duhig ug usa ka Pyke Luminda gidala Huwebes uban sa mga armas didto sa Investigation Detection and Management Branch sa Davao City Police Office. (BOT/AD)