HUGOT nga gipatuman sa bag-ong hepe sa Cagayan de Oro City Police Office ang "two strike policy" ngadto sa mga station commander diha sa pagsulbad sa pagpangawat sa motorsiklo ning siyudad.

Gipasabot ni City Police Director Benedicto Lopez, nga kung sa usa ka bulan dunay duha ka mga kaso nga kawat sa motorsiklo sa area sa usa ka police station ug dili makahatag og positibo nga resulta ang station commander tangtangon kini sa iyang puwesto ug ibalhin sa Maharlika Headquarters isip usa sa mga staff.

"This policy is a wake up call for all station commanders kaya dapat magtrabaho sila especially the occurence of crime mostly happen during daytime," matod ni Lopez sa Sun.Star Cagayan de Oro.

Nasayran nga ang two strike policy gitagana alang sa kasulbaran sa mga pagpangawat sa motorsiklo nga giingong rampant ning siyudad.

Gumikan niini, pipila sa mga station commanders ang nagpakita og pagsupak apan sa gihapon wala silay nahimo sa kamandoan ni Lopez labina nga giuyonan usab kini ni Konsehal Ian Mark Nacaya, chairman sa committee on police matters.

Gimando usab ni Lopez sa mga station commanders nga mag-deploy og dugang personahi sa ilang area labina panahon sa buntag.

"Dapat before eight in the morning andyan na sila sa station to supervise the deployment of personnel," dugang ni Lopez. (Annabelle L. Ricalde)