UBOS balay-balaoranan versus senado. Nagpatas-anay sa ihi sila si House Speaker Bebot Alvarez ug Senate Pres. Koko Pimentel kinsay daghang napanday nga balaodnon ug resolusyon.
Mitimang ang senado niadtong kayagaw sa resolusyon sa DOJ human sa house investigation sa kasong pagpatay ni Albuera Mayor Rolando Espinosa ug Raul Yap sa Baybay Sub-provincial Jail sa kasong murder batok ni Supt. Marvin Marcos ug 18 ka kauban sa CIDG 8 nga gi-downgrade ngadto nalang sa homicide diin nakatagamtam og temporaryong kagawasan ang mga akusado.
Ang DOJ mihatag og gibug-aton sa depensa nga misukol si Mayor Espinosa nga nagtinil og armas sulod sa prisohan. Si Sen. Koko Pimentel nga gidasonan nila ni Sen. Ping Lacson, Chiz Escudero ug Dick Gordon miawhag nga buksan og balik ang inbestigasyon pinaagi sa Senate Blue Ribbon Committee sa pagdemanda og tubag ngano ang kasong murder giubos ngadto sa homecide.
Nagkasungi usab ang baruganan sa kongreso sa pagpatay nila ni Mayor Samsudin Dimaukom sa Datu Saudi, Ampatuan, Maguindanao ug Mayor Reynaldo “Aldong” Parojinog sa Ozamis City. Ang tulo ka mga mayor nga gipatay naa sa drugs watchlist ni Presidente Rodrigo Duterte.
Nagsumpaki sab ang panglantaw sa kongreso sa pagpatay nila ni Ret. Surigao City Judge Victor Canoy ug Butuan Trial Court Judge Godofredo Abul Jr.
Ubos balay-balaoranan versus Court of Appeals (CA). Nagkasungi kabahin sa desisyon batok sa unom ka mga opisyal o Ilocos 6 ubos sa buhatan ni Ilocos Norte Gov. Imee Marcos sa dili maayong paggamit sa pundo sa tobacco excise tax nga gipalit og sakyanan nga P66.45M.
Ang Ilocos 6 nahiagom og indefinite detention human modumili sa pagpanubag sa dihang nangayog higayon nga ila pang subayon ang mga rekord sa transaksyon. Apan ang Committee on Good Govt. and Public Accountability ubos nila ni Surigao del Sur Rep. Johny Pimentel, House Majority Floorleader Ilocos Norte Rep. Rodolfo Fariñas ug House Speaker Pantaleon Alvarez mi-contempt sa Ilocos 6.
Hunyo 9, 2017 ang CA mimando nga makapiyansa ug isibog ang kaso batok sa Ilocos 6 apan ang ubos balay-balaoranan wala mosanong sa maong kamandoan. Abogado sa mga Marcos nga si Atty. Estelito Mendoza mipiit sa CA pag-isyo og writ of habeas corpus ug pagpagawas sa unom ka mga binilanggong opisyal.
Si Gov. Marcos ug Ilocos 6 misang-at sa Supreme Court og Writ of Amparo petition pagbabag sa ubos balay-balaoranan sa pagpadayon sa inbestigasyon apan napakyas. Napugos si Marcos sa pagtambong sa house investigation nga maoy naghatag og dalan nga nakagawas ang Ilocos 6. Maong si Alvarez misang-at og impeachment batok ni Chief Justice Ma. Lourdes Sereno nga nagpaluyo sa CA.
(csa_1156@yahoo.com /0916-734-5737)