USA ka sakop sa Civilian Armed Forces Geographical Unit (CAFGU) ang nasamdan human nagtakus ang ilang pwersa ug New Peoples Army didto sa Sitio Langon, Barangay Coronon, lungsod sa Sta. Cruz, Davao del Sur.
Sumala sa nakalap nga impormasyon sa Sun. Star Superbalita, nahitabo ang pagbinayloay sa mga bala tali sa mga Cafgu ug committee front 51 sa mga rebeldeng New Peoples Army (NPA), mga alas 5:30 ang takna sa sayong buntag kagahapong adlawa.
Gikumpirma sa 39th Infantry Battalion nga adunay nasamdang Cafgu nga sakop sa 72nd Infantry Battalion ug nailhan kini nga si Caa Antonio Amo, kinsa nadestino sa detachment didto sa lugar.
Si Lieutenant Raul Villegas, civil military operations officer, nagkanayon sa telepono, nga naigo ang cafgu sa tiil ug lubot sa away nga nilungtad sa 7 ka minuto tali sa grupo ni Kumander Jag-jag.
Apan, matod niya nga sigurado silang adunay samdan sa grupo sa mga NPA human nakita ang mga tulo sa dugo didto sa giagian sa mga kaaway nga niatras padong sa bukirang bahin sa lugar.
Hinuon, dako ang pasalamat sa tropa sa gobyerno nga way namatay sa ilang han-ay apan di pa masuta sa bahin sa mga rebelde.
Gihulagway ni Villegas nga nahitabo ang binakbakay sa dihang nagpatrolya ang mga cafgu human nakadawat og taho nga niadtong Miyerkules sa gabii pa nag-pwesto ang mga NPA didto sa panimalay nila ni Lolong Simbajon ug Beloy Panday.
"Mabuti na lang walang sibilyan na wounded kasi maraming bahay doon sa pinagtaguan nila," ni Villegas pa.
Sumala sa militar nga hayan naghuwat sa ilang koleksyong kwarta ang mga rebelde gikan sa mga patigayon sa lugar.
"In line din kasi eto sa eleksyon, at extortion yung motive nila aside from gusto na nilang manghingi ng permit to campaign kasi yung ibang tao pinaalis nila sa lugar," matod sa opisyal.
"Di natin alam baka may plano rin silang iba kasi andun din ying tower ng Globe telecom," sumala ni Villegas.
Sa pagsuwat ning balita, nagpadayon pa ang pagukod sa militar sa mga rebelde.
Sa pikas bahin, gipataas dayon sa Sta. Cruz Police Office ang alerto aron di makaduol sa ilang buhatan ang mga rebelde.(Orlando B. Dinoy)