HELLO!!! Nasayud ako nga pipila kaninyo napura na pod sa mga balita nga adunay kalambigitan sa "former" kay natangtang naman sa pagka-Chief Justice sa nasud Pinas si Maria Lourdes Sereno.
Dili ko brayt sa pamalaod ug dili pod nako kaayo maesplika ang mga legal nga terminolohiya sama sa "quo warranto" mao tinamban ra kining chicka nato. Dili ta magpa-aron-ingnon nga utukan aron dili kita magabaan. Okay lang ba, mga silingan?
Anyway, ato lang sutaon ang depinisyon sa "quo warranto" alang niadtong gusto makisayud. Ang "quo warranto" gikan sa pinulongang Latin nga "pinaagi sa warrant o awtoridad." Usa kini ka legal nga pamaagi diin hagiton sa grupo o indibiduwal ang katungod sa tawo o awtoridad ibabaw sa posisyon nga iyang gihuptan.
Ubos sa Rule 66 sa Rules of Court, usa ka petisyon sa warrant nga gisang-at sa gobyerno o usa ka indibiduwal batok sa "usa ka tawo nga nag-ilog, nag-akusar, o supak sa balaod nga naghupot o nag-ehersisyo sa katungdanan, posisyon o franchise sa publiko."
Nasabtan ba nato, bro? Maayo nga wala pa kita nasunggo. Dili diay lalim mag-abogado no?
Si Sereno, natangtang sa iyang posisyon pagka-Chief Justice pinaagi sa quo warranto kay wala kuno siya nagsubmitar og kompletong statement of assets liabilities and net worth kun SALN nga magkuwalipika niya nga molingkod isip pinakataas nga opisyal sa korte suprema. Mora'g nakalusot bah!
Ang pagsumite sa SALN usa ka balaod ubos sa Article XI Section 17 sa 1987 Constitution ug Section 8 sa Republic Act No. 6713, ang "Code of Conduct and Ethical Standards alang sa mga opisyales ug empleyado sa publiko."
Naglakip kini sa usa ka waiver nga nagtugot sa Ombudsman o sa iyang awtorisadong mga representante aron makakab-ot sa mga dokumento nga mahimong magpakita sa mga kabtangan, mga utang, bili, interes sa negusyo, ug mga pinansiyal nga koneksiyon gikan sa tanang mga angay nga ahensiya sa gobyerno.
Tungod kay balaod, bisan dili pangayuon - responsibilidad kini nga ideklara sa matag empleyado sa gobyerno. Klaro? Dili puwede nga wala kita nagsubmitar kay wala kita gipangayoan kay dako kaayo ang posibilidad nga wala kita nakabayad sa husto nga buwis sa tanan natong kinitaan. Dili ba trabaho kini sa mga "tikasan?"
Bitaw, hastang brayta baya ni Sereno. Gani, siya ang nag-inusarang babayeng punong hukom sa Pinas sa edad nga 52. Ngilngig kaayo siya'g natapos kay salutatorian ug valedictorian lang naman iyang mga titulo.
Kursong Economics sa Ateneo ug Law sa University of the Philippines, plus sa University of Michigan iyang Master's Degree- grabeeeeeeeeee!
Pero what's so funny mao kini... ang iya mismong mga kauban sa korte ang mibotar nga pahawaon siya! Wala ko kabalo kung dunay "attitude problem" si Sereno pero kung ang kalaban nimo anaa ra sulod sa imong opisina, dili kaha nagpasabot kini nga aduna gayuy problema (sa iya o sa sistema)??? Unsa ka ha?
Sa pagkatinuod, mora'g lawom ra kaayo alang nako ang ilang mga hisgutanan mao mosulti na lamang ako sa akong mga namatikdan. Una, makapawala'g pagsalig ug kompiyansa sa mga opisyal nato sa gobyerno ilabi na nga anaa sa departamento nga mohatag kanato'g "hustisya," kung sila mismo ang mangunay og paglapas sa mga balaod.
Ikaduha, iyang giingon sa daghang higayon nga "SIYA KUNO ANG MOHATAG OG TINGOG SA MGA KABATAAN UG MGA GIDAUGDAUG." Magickera siya? Buot pasabot nga kung naa siya sa katungdanan masulbad na ang mga pagpanglapas sa tawhanong katungod, kahigalaan? Wala man gani hangtud karon nasulbad ang Vizconde ug Ampatuan Massacre nga 2012 pa man siya naa sa puwesto.
Lisud gayud kung makatilaw ta'g gahum sa taas nga posisyon kay maglisud kita'g buhi, igsuon. Sa ngalan nga dili ka masaligan sa ginagmay'ng butang sama sa pagdeklara sa imong kinitaan matag-tuig, dili pod ka masaligan sa dinagkung mga butang. Ang mga kauban mismo nimo ang nagboto nga pahawaon ka- ayaw na'g pamugos mopabilin dinha nga daw sama sa tuko, miga.
Walay "all powerful" pero daghan ang "fool" kon buang nga daw sila ra gayud ang hawod ning kalibutan. Walay perpekto apan nindot kung nasayud kita kung hangtud asa lang ang atong kakayahan aron ang kinabuhi dili magkaguliyang.
Kay Sereno, I say, human na ang higayon ug walay permamenteng butang dinhi sa kalibutan mao dili nato kini ugatan. Maayong pagpamalandong, mga Inday ug Dodong.