NAHUMAN ra gyud ang eleksiyon sa mga opisyal sa barangay ug sa Sangguniang Kabataan niadtong milabay nga Lunes. Usa ko sa mga wa makaboto tungod sa atong pag-uban sa mga atleta nga nagrepresentar sa mga persons with disability (PWDs) sa ginapahigayon nga 6th PSC Philspada National Para Games sa Marikina City.
Maayo ang dagan sa gipahigayon nga eleksiyon kay gamay lang ang natala nga kaso kalabot sa piniliay gawas sa mga barangay diin dunay nahitabo nga kaguliyang ug pagpamatay sa mga kandidato.
Tungod sa politika, dunay mga relasyon nga nangabungkag apil ang mga sakop sa panimalay tungod sa ginaingon nga demokrasya apan ang uban daw nabutahan kay alang nila ang ilang kandidato nga gilabanan mao lang ang angayan nga himuong lider.
Ang uban nagtan-aw lang sa ilang kaugalingon nga interest nga makahimulos sa kahigayonan ug makadawat sa suweldo gikan sa panudlanan sa barangay samtang ang ilang amo naa sa puwesto.
Dunay pipila ka barangay sa nasud nga walay nidagan nga mga batan-on. Mas maayo man nga dili magpaluma-luma'g dagan kay sa magpapili nga way kabangkaagan, unsay buhaton ugaling naa na sa puwesto.
Dunay mga batan-on ang napugos pagdagan tungod maoy gusto sa ilang mga ginikanan.
Hinumdomi baya ninyo nga naa mo sa puwesto aron moserbisyo Kay hukman gihapon mo sa katawhan inig abot sa panahon.
Sa dula sa Paragames, nagkadaiya ang reaksiyon sa mga atleta sa programs sa gobyerno alang nila sa natad sa paugnat sa kusog. Taas ang ekspektasyon sa mga atleta kay national level naman ang kompetisyon apan nakita ang kakulangon sa pagpangandam tungod daghang dula ang wa masugdan sa tukmang panahon.
Dunay dula nga gitakda nga sugdan sa alas 9 sa buntag hinungdan nga ang mga buta sayo nangmata aron mangandam nga dili maulahi apan gipanglaay pagpaabot kay hapit na alas 11 gisugdan kay Wala pa maandam ang mga himan sa dapit dulaanan.
Naa man untay mga tawo nga nasangunan apan ang serbisyo kulang.
Duna pay daghang local govenment unit nga kulang ang programs alang sa PWDs hinungdan nga daghang kanila ang nakadayeg sa suporta sa gobyerno sa dakbayan sa Davao Kay eroplano ang gisakyan sa kapin 30 ka atleta uban sa suporta sa pagkaon ug sakyanan.
Sa atong nakita, dako pa ang kakulangon aron pakusgon ang tim sa Davao apan mapasalamaton ta nga kon sa isla sa Mindanao dili ulahi ang PWDs gikan sa dakbayan sa Davao.