MAGUINDANAO PROVINCE -- Taas nga alerto ang gipatuman sa militar ug kapulisan tungod sa giingong plano sa Bangsamoro Islamic Freedom Fighters (BIFF) nga mangatake sa probinsiya ug sa North Cotabato.
Sumala pa nga molusad og halapad nga pagpangatake ang BIFF atol sa Holy Month of Ramadhan.
Punting sa mga terorista ang pagsulong sa mga kampo sa militar ug kapulisan apil na ang pagpamomba sa mga inilang dapit sa Mindanao.
Ang taho nakuha gikan intelligence unit sa militar ug kapulisan sa Central Mindanao.
Kahinumdoman nga niadtong miaging tuig atol sa Ramadan nangatake sab ang BIFF ug liboan ka pamilya ang naapektuhan sa kagubot.
Una nang nagdeklara og Jihad o Holy War si Shiek Esmail Abdulmalik, alyas Kumander Abu Toraifie, nga gitumbok karon nga emir sa BIFF-ISIS Inspired Group sa Mindanao.
Niadtong Nobyembre 2017, una nang mikatag ang taho nga napatay si Kumander Abu Toraifie sa gilusad nga air to ground assault sa militar sa Maguindanao apan dakong buhi pa diay kini ug nagtago-tago lamang sulod sa SPMS Box.
Nagpadayon ang Law Enforcement operation sa Joint Task Force Central batok sa BIFF sa Maguindanao ug North Cotabato. (Edgar E. Fuerzas)