KWARTA balor og P50-mil pesos ang malampusong natangag sa wa mailhing mga suspetsado human nila giransak ang buhatan sa Kauswagan Water System Cooperative sa Barangay Kauswagan, dakbayan sa Panabo, Miyerkules sa buntag.

Sumala sa report gikan sa Panabo City Police Station (CPS) nga pasado alas 6:00 sa buntag, nadiskubrihan na lamang nga ang opisina sa chairman sa nahisgutang kooperatiba nga si Leo Inodeo gisulod sa mga kawatan.

Si Kapitan Patricio Marquita sa Barangay Kauswagan maoy mitaho sa hitabo ngadto sa kapulisan.

Gilayon miresponde ang mga mga pulis gikan sa Panabo CPS aron susihon ang hitabo.

Migawas sa inisyal nga imbistigasyon ni Police Officer 3 Johnny Calamba nga giguba sa mga suspek ang padlak sa pultahan aron ilang agian pasulod ug pagawas sa patigayon.

Giguba sab sa mga suspek ang safety vault sulod sa opisina hinungdan nga natangag gayod ang kapin P50,000.00 nga salapi.

Ang kapulisan sa dakbayan sa Panabo na og pakisusi sa maong kawat.

Padayon sab nga gipanid-an sa mga otoridad ang mga tawo nga gikatahapang nagpaluyo sa krimen. (Marvin Pineda)