LIBUAN ka nagkadaiyang klase sa mga bala ang nakalutan sulod sa bay sa ugangan ni Datu Unsay Municipal Mayor Datu Andal Ampatuan, Jr. sa probinsiya sa Maguindanao.
Base sa taho gikan sa Tactical Command Post sa 6th Infantry (Kampilan) Division sa Philippine Army, nasuta nga banda alas 11:00 sa buntag, Enero 20 nahitabo ang pagronda sa dapit.
Gisulod sa hiniusang puwersa sa Criminal Investigation and Detection Group (CIDG-12), National Bureau of Investigation (NBI), ug 104th Brigade sa Philippine Army nga gipangulohan ni Maguindanao Police Provincial Director, Senior Superintendent Alex Linesses ang mansiyon ni Bai Amira Nor Santiago.
Si Santiago, mao ang inahan sa asawa ni Datu Unsay Mayor Datu Andal Ampatuan Jr.
Nakuha sa mga otoridad ang mga bala sa 60 machine gun, 40mm, M16 armalite rifles, M14, AK-47 rifle, kalibre .45, K3 machine gun, B-40 anti-tank rockets, 9mm pistol ug uban pa nga gilubong likod sa maong pinuy-anan.
Ang ronda sa mga otoridad, gibase sa search warrant nga gipagula ni Kidapawan City Judge Francis Palmones.
Dako ang pagtuo ni Linesses nga ang mga bala, gipanag-iyahan sa pamilyang Ampatuan samtang ila na gisang-at sa korte ang kaso batok kang Bai Amira Nor Santiago.
Gidugang ni Linesses nga muabot pa sa 2,170 ka mga armas ang ilang gipangita, lakip na ang 402 nga gi-isyu ngadto sa mga pulis sa Maguindanao nga gilambigit sa masaker niadtong Nobyembre 23, 2009.
Apan sa gihimong pakighinabi sa Bombo Radyo kang Santiago ug kang Bai Rebecca Ampatuan, ilang gibutyag nga 'planted' matud pa ang nakuhang mga bala sa ilang pinuy-anan gumikan kay dugay na silang wala magpuyo sa maong dapit.
Gidugang nila nga bisan ang ilang caretaker, wala pasudla sa ilang bay. Pagtuo nila nga tumong lamang niini mao ang paghimo og kagubot sa Maguindanao. (Edgardo Fuerzas)