DUHA ka mga suspetado ang gipangita sa kapulisan aron sikopon ug silotan sa ilang pagpusil sa unom ka mga lalaki sa alas 4:15 sa kaadlawon Martes didto sa Kilometro 14, Barangay Panacan, siyudad sa Davao.

Gipangita mao sila Dodoy Llomas, alyas Budjack, 18, nagpuyo sa Mercedez Subdivision, Barangay Panacan ug Marclin Lompania, alyas Mac-mac, 18, nagpuyo sa San Miguel, Barangay Panacan.

Sila Llomas ug Lampania maoy gitudlong mipusil sa mga biktima nga sila si Mark Vincent (bansagon gitago kay menor), 14, nagpuyo sa Kilometro 11, Barangay Sasa; Jayhan (bansagon gitago), 15, nagpuyo sa Do¤a Salud Subdivision; Jeffrey Santos, 23, nagpuyo sa Do¤a Salud Subdivision; Alan Duran, 18, nagpuyo sa Kilometro 12, Barangay Sasa; Roger Flores, 19, Kilometro 11, Barangay Sasa ug Jomar Cortez Sitjar, 23, nagpuyo sa Do¤a Salud, Barangay Sasa.

Si Vincent naigo sa iyang pus-on, si Jayhan naigo sa iyang walang paa, si Santos naigo sa iyang tuong tiil, si Duran naigo sa iyang walang paa, si Flores naigo sa iyang walang kilid ug si Sitjar naigo sa iyang tuong tiil.

Ang spot report sa Sasa Police Station nagbutyag nga gikan ang mga biktima sa Panacan Relocation ug dihang miabot sila sa Kilometro 14 ilang nakita nga dunay mga batan-on nga nag-riot sa maong lugar.

Wala madugay, suma sa taho, giatangan sila sa usa ka alyas Budjack ug walay daghang pangutana gipamusil sila gamit ang wala matino nga kalibre sa armas.

Human sa maong insidente, daling mibiya ang suspetsado samtang ang mga kauban niini midagan paingon sa wala na masayri nga lugar.

Sa gihimong follow-up operation sa Sasa Police Station, tulo ka mga menor de edad nga giingon nga kauban sa mga suspetsado ang na-rescue ug atua karon sa City Social Services and Development Office Bunawan District.

Si Sitjar, usa sa mga biktima, nasuta nga dunay kasong murder sa Regional Trial Court Branch 33.

Atua siya karon sa selda sa Bunawan Police Station samtang gipaabot ang sunod nga mando sa korte. (AD)