SUPERBALITA CEBU

Editoryal: Gukdon

Editorial Cartoon by John Gilbert Manantan

NAKAHILAK sa usa ka interview si Department of Tourism Secretary Bernadette Romulo-Puyat, kinsa bag-o lang gitudlo ni Presidente Rodrigo Duterte nga mangulo sa mao nga departamento puli kang Wanda Teo.

Naemosyonal si Puyat human niya makita ang giingon nga grabeng gasto sa DOT sa iyang budget sa mga proyektong wa mag-agi gani og bidding. Naandan unta nga proseso sa kagamhanan mao ang pagpahigayon og bidding sa tanang mga proyekto, gawas sa pipila ka mga sirkumstanya.

Bag-o lang nahibaw-an ang paggahin sa kagamhanan og P320 million alang sa Buhay Carinderia ni Cesar Montano, pangu sa Tourism Promotion Board.

Nakapagawas na ang kagamhanan og P80 million sa kontrobersyal nga proyekto nga naglambigit sa aktor bisan kon wa pa kini mahuman. Ang proyekto may kalambigitan sa food tourism program.

Ipasusi kini ni Puyat nganong nahitabo kini.

Matod niya nga kada adlaw duna siyay nadiskobrehan sa departamento nga kwestyonabling mga proyekto.

Nahibaw-an pa niya nga dunay mga fashion show sa abroad nga dagko ang mga gasto.

Kining karenderya project di lang maoy kontrobersyal ubos sa pamunoan ni Teo. Naaghat siya sa pag-resign tungod sa kontrobersyal nga P60 million nga kontrata sa DOT ug sa sibyaanan sa telebisyong PTV4.

Nahibaw-an nga ang P60 million nga advertisement sa DOT gibutang sa blocktime program sa iyang duha ka mga igsuon.

Maayo nga susihon ug tinud-on ni Puyat ang pagsusi sa mga proyekto sa DOT. Kon duna may kinahanglan nga ikiha, angay niya kining buhaton sa ingon masilutan ang mga nagawari-wari sa kwarta sa kagamhanan.

Dinhi mapakita nga kining mao nga administrasyon tinud-anay nga molimpyo sa gobyerno alang sa tinud-anay nga kausaban.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph