TULO ka mga mayor sa Sugbo ang wala gidapit sa private dinner ni Presidente Rodrigo Duterte sa Cebu City Waterfront Hotel and Casino sa Barangay Lahug, dakbayan sa Sugbo niadtong Sabado sa gabii.
Ang Office of the Presidential Assistant for the Visayas (OPAV) maoy nagpasiugda sa maong panihapon alang sa presidente uban sa local executives.
Sumala sa pipila ka kasaligang tinubdan, wala gidapit sa maong panihapon sila si Cebu City Mayor Tomas Osmeña, Ronda Mayor Mariano Blanco III ug Daanbantayan Mayor Vicente Loot.
Sa tulo, si Mayor Blanco maoy wala mopakita sa hotel.
Si Mayor Osmeña gikontak sa Superbalita Cebu ug nikompirmar nga wala gidapit sa private dinner sa mga mayor ug bise mayor sa lalawigan sa Sugbo apan niadto sa hotel tungod sa laing katuyoan.
Gihimakak niya ang estorya nga gibabagan siya sa Presidential Security Group (PSG) ug wala pasudla sa pribadong panihapon uban sa mga opisyal sa kalungsoran.
“No I was not refused entry but, I was not invited and that’s okay with me. During the games (Philippine National Games) opening, Governor (Junjun) Davide also said he was not invited,” matod ni Osmeña.
Silang Osmeña ug Duterte nag-abot ug naglamanohay atol sa opening sa Philippine National Games sa Cebu City Sports Center niadtong Sabado, apan wala sila nagtapad og lingkod.
Ang mayor sa dakbayan sa Sugbo niingon nga wala niya gibasol si Duterte sa wala pag-imbitar dili usab siya insecure sanglit gihupay siya sa mga Sugbuanon sa resulta sa barangay eleksyon nga 49-31 ang nidaog sa mga barangay kapitan pabor sa BOPK batok sa Team Rama.
GISYAGITAN NI TOMAS
Tungod sa wala matino nga rason, si Konsehal "Junjun' Osmeña nisulti sa SunStar Cebu nga gisiyagitan ni Tomas, kinsa iyang uyoan, sa lobby sa Waterfront Hotel human sa maong private dinner.
Matod ni Junjun nga niadto siya sa hotel sanglit aduna siya'y bisita nga si kanhi Manila Mayor Alfredo Lim.
Dihang nagkasugat sila sa iyang uyoan nga mayor, gikalitan lang siya og hingilin.
“Pag-abot nako didto (lobby) nagsugat gyud mi (ni mayor), padung siya gawas para CR sugat mi. Pagsugat namo, ang-ang moatras ko, niana ko good evening Tito pero ingon siya 'get out.' Karon pako kita ingon ana siya kasuko,” paghulagway ni Junjun diin daghan ang mga tawo nga nakadungog.
“Ayaw pag-ingon ana kay dili mani imong hotel pagsiyagit niya niduol gud dayon ang iyang body guard. Naghuwat lang ko nga ipadaplin ko sa body guard wa man sad. Dili mani imong hotel.” saysay batan-ong Osmeña sa pakighinabi sa SunStar Cebu.
Si Junjun niingon nga human niadtong hitaboa, daw nawala ang iyang respeto sa iyang uyoan ng mayor diin siya nagduda nga grabe ang kasuko sa mayor gumikan sa pagkapakyas sa P18 bilyones nga development sa Kawit Island nga gipaboran niini apan gisanta sa mga konsehal sa Team Rama.
Loot nagpahipi
Nakasabot si Daanbantayan Mayor Vicente Loot kon nganong wa siya imbitara og apil sa private dinner sa mga mayor ug bise mayor apan nagpahipi.
Matod sa mayor, nga wala usab siya moadto sa maong hotel aron mosuway og pakighinabi sa presidente human nasuta sa iyang gisugo wala siya maapil sa gidapit sa panihapon.
Apan naninguha siya nga makaestorya si Duterte human siya nganli niini niadtong 2016 nga usa sa mga drug protector.
Siya nitug-an nga mao na kini ang iyang gibuhat sa nangaging duha na ka tuig.
“Ang ako lang ba matagaan og higayon makaestorya ang president,” hangyo sa retirado nga heneral sa Philippine National Police (PNP).
Siya nidugang nga dunay resources ang kapulisan ug ubang ahensiya sa gobiyerno nga naggukod batok sa gidili nga drugas aron pag-monitor sa iyang mga kalihokan sukad siya nagsugod sa pulitika sa dihang siya nidaog pagka mayor sa Daanbantayan niadtong 2016.
Wala makuha sa Superbalita Cebu ang habig ni Mayor Blanco kinsa naduhig usab sa kontrobersiya sa gidiling drugas. (B)