KON maluka ang mga gamot ug matumba ang usa ka dakong kahoy, maoy una nimong maalinggatan ang kahaw-ang sa palibot niini.

Kon mopiyong ka ug maminaw, imong madungog ang kanaas ug hagtob sa iyang pagkapukan taliwa sa dakong kahilom ug kamingaw sa kakahoyan.

Click here for stories and updates on the Sinulog 2010 Festival.

Mao kini ang kahaw-ang nga akong nasinati sa kalit nga pagtaliwan ni Press Secretary Cerge Remonde niadtong Martes, Enero 19, didto sa kaulohan.

Ngano kaha nga sayo mang sakmiton sa kamatayon kadtong mga tarong ug buotan?

***

Ang hamubong kinabuhi ni Press Secretary Cerge Remonde mabulukon ug angay nga kapanaminan sa mga kabos sama kanato nga wa magpadaog sa kalisod, naningkamot sa pagtungha ug nagmalampuson.

Sa ginaingon pa, poverty is not a hindrance to success. Ang kakabos di babag sa kalampusan.

Dunay malampuson na unta apan nag-abuso ug nabangkarota.

Nagsunod to sila sa ginaingon nga success is not a hindrance to poverty.

Di malalim ang giagian ni Cerge Remonde. Gikan sa lungsod sa Argao, niabot siya sa Palasyo sa Malakanyang.

**

Gimanso ni Cerge Remonde ang iyang abilidad sa pagsulat ug pagsibya sa radio aron makatampo sa iyang propesyon ug sa pag-alagad sa nasod.

Nikabat og siyam ka tuig ang iyang serbisyo sa gobyerno ubos ni Presidente Gloria Macapagal-Arroyo isip Press Undersecretary, pangulo sa IBC 13 ug RPN 9, Secretary for Government Mass Media, Director General sa Presidential Management Staff ug hangtod sa nahimo siyang Press Secretary didto sa Palasyo sa Malakanyang.

Apan ingon sa ang katapusang puwesto nga iyang nahuptan maoy naka-ugtas kaniya ug nisangpot sa grabeng atake sa iyang kasingkasing.

**

Katapusan nakong nahinagbo si Press Secretary Cerge Remonde atol sa ika-84 nga Alumni Homecoming and Reunion sa University of the Visayas, ang among alma mater, niadtong Enero 12 sa gabii didto sa Casino Espanol de Cebu.

Siya maoy gipasidunggan nga Most Outstanding Alumnus. Siya usab maoy pinasidunggang dinapit ug mamumulong.

Gisaysay niya ang kalisod sa kausaban sa iyang tahas gikan sa pagkasakop sa media nga maoy moatake sa gobyerno ngadto na sa usa ka Press Secretary nga maoy modepensa sa gobyerno.

Nanagingting pa sa akong mga dunggan ug panumdoman ang iyang daklit ug wa damhang pasidaan ngari kanako: “Busa Eddie Barrita, ayaw palabig pasakit og pangatake kay tingalig moabot ang panahon nga ang imong giatake mao nay imong depensahan.”