GITUDLO isip bag-ong finance and logistics officer sa Cebu Provincial Police Office (CPPO) si Sr. Insp. Irish Delim, kanhi hepe sa Daanbantayan Police Station sa lalawigan sa Sugbo.
Siya girelibohan sa pwesto sugod niadtong Mayo 17, upat ka adlaw human rakraki sa armadong mga tawo si Daanbantayan Mayor Vicente Loot ug pamilya samtang sakay sila og pump boat sa New Maya Port sa Barangay Maya niadtong Mayo 13.
Si Delim sa iyang bahin, nipadayag nga wa siya mahibawo sa klarong rason sa pagkahulip niya sa pwesto apan, nalipay nga nabalhin siya sud og opisina sa CPPO labi na magtulo ka buwan na ang iyang gisabak nga maoy umaabot niyang ikatulong anak.
“Sa tingin ko lang, I’m in a better situation now,” dugang ni Delim, kinsa giilisan ni P/Sr. Insp. Adrian Nalua, kanhi hepe sa San Fernando Police Station.
Kapin sa usa ka tuig nga nahimong hepe si Delim sa DPS sukad niadtong Mayo 8, 2017, nga unang nahimong deputy chief sa Bogo Police Station.
Si Sr. Supt. Manuel Abrugena, director sa CPPO, niingon ang pagkatangtang ni Delim isip hepe sa kapulisan sa Daanbantayan kabahin sa nagpadayon nga realignment sa ilang mga sakop.
“We are also determining whether she had committed supervisory lapses being the chief of police of Daanbantayan in relation to the Maya strafing incident,” sumala sa director sa text message nga gipadala ngadto sa Superbalita Cebu kagahapon.
Si Provincial Board Member Sun Shimura mohatag unta og privilege speech atol sa regular session sa Sangguniang Panlalawigan sa Sugbo kagahapon sa hapon kabahin sa nahitabong pagpangrakrak ngadto sa iyang pamilya, apan wala na kini ipadayon.
Matod niya, dili na siya kinahanglan mag-privilege speech kay giilisan na ang hepe sa Daanbantayan nga iyang gikwestyon kon nganong way nakita nga presensiya sa mga pulis sa pantalan diin adunay daghang mga tawo nga gikan namiyesta sa Barangay Logon, Malapascua.
Atol sa session, gipalabang sa Provincial Board ang resolusyon nga giduso ni Shimura nga hugot nag-awhag sa Police Regional Office (PRO) 7 ug CPPO nga magbutang og police outpost sa matag pantalan sa lalawigan sa Sugbo apil ang mga lugar nga suroyanan og mga turista ug magdestino og mga pulis 24 oras sa tibuok semana.
Si Shimura nipadayag nga gawas sa iyang pamilya, siya nabalaka usab alang sa turismo ug ekonomiya human sa insidente sa pagpangrakrak kay adunay pump boat nga gisakyan og pulos mga langyaw nga mga babaye nga diha duol sa ilang nahimutangan.
“Unsa naman lay ilang feedback ato sa ilang nasod nya, how unsafe the province of Cebu and then Daanbantayan and the Malapascua is right now. So, nabalaka ko sa atong ekonomiya, sa atong turismo pareha sa kabalaka sa atong pamilya pud sa nahitabo,” dugang ni Shimura nga nahinabi sa mga tigbalita sa wala pa magsugod ang session.
Si Delim nanalipod nga dunay mga pulis nga nadestino sa pantalan apan naa kini sa police station kay mag-ihap alang sa final pre-deployment uban ang dugang mga pulis nga gi-augment ug mga sundawo.
Siya nibutyag nga Pebrero pa lang nananghid na siya daan ni Mayor Loot nga dili makatiwas sa iyang pagka hepe sa kapulisan sa lungsod gumikan sa ilang mandatory schooling.
Samtang ang Police Regional Office 7 mopalambo pa sa ilang intelligence monitoring sa laing pasangil ni Presidente Rodrigo Duterte nga adunay daghang gitago nga ilegal nga drugas sulod sa kwarto ni Loot.
Si Chief Supt. Robert Quenery, director sa kapulisan sa Central Visayas, wa mo supak sa pamahayag sa presidente sanglit nahibaw kini sa mga impormasyon gikan sa intelligence sa militar ug kapulisan ug ubang ahensya sa gobierno.
Si Loot nihagit sa kapulisan nga ilang susihon ug siksikon ang tibuok niyang panimay aron masuta kung tinuod ba ang pasangil ni Presidente Rodrigo Duterte.