ANG nag-unang unom ka mga presidentiable ang ania karon dinhi sa Sugbo alang sa usa ka presidential forum karong hapon nga gipasiugdahan sa kahugpungan sa business community dinhi sa Sugbo. Anha kini ipahigayon sa Cebu International Convention Center [CICC] nga sugdan sa alas 4 sa hapon. Kompirmadong motambong mao sila si Gilbert ‘Gibo’ Teodoro, Manny Villar.
Noynoy Aquino, Richard Gordon, Joseph Estrada ug Brod. Eddie Villanueva. Wala na lang nila imbitaha kadtong uban kay wala man sab to silay ayo.
Ang Cebu Chamber of Commerce and Industry, Mandaue Chamber of Commerce ug Cebu Business Club mao ang nagpasiugda ning maong kalihukan. Maayo kini aron ato gyud mahibaw-an kon unsa man ang baruganan niining gustong magpapili sa pagkapresidente sa nag-unang mga isyo karon labi pa ang sa natad sa ekonomiya.
Makita dinhi kon kinsay adunay maayong panglantaw ug adunay insaktong plata porma de gobiyerno.
SUROY-SUROY
Suroy-suroy sa Sugbo na usab. Apan daghan ang nakasaway karon gumikan kay gisagulan og pamulitika ni Gov. Gwen Garcia ang maong kalihukan nga ang tumong mao unta ang pagpalambo sa turismo. Tiaw ba nimo kanang gipakuyog sa gobernador si presidential candidate Gilbert ‘Gibo’ Teodoro sa Lakas-Kampi ingon man ang pipila ka mga senatorial candidate nga sila si Adel Tamano ug Gilbert Remulla nga nanagan ubos sa Nacionalista Party. Si Loren Legarda, kinsa magpapili pagkabise presidente uban ni Manny Villar niapas kagahapon.
Morag nahulog lagi nga kampanya na. Sa matag pa-ila-ila ni Gibo, tawgon na siya og sunod nga presidente. Klaro ug tataw kaayo nga gigamit lang ni Gwen nga pamulitika kining Suroy-Suroy.
Dili lamang sa iyang kaugalingong interes kay magpasubli man siya kon dili sa iyang gisuportahan nga mga nasudnong kandidato. Libre pa ra ba. Unsa man kuwarta sa mga magbubuhis ang gigamit?
HOMECOMING
Moabot karong adlawa ang lawas ni Press Secretary Cerge Remonde.
Anha kini hayaon sa Malacanang sa Sugbo og usa ka gabii sa dili pa kini i-uli sa iyang yutang natawhan didto sa lungsod sa Argao. Mao kini ang katapusang homecoming sa akong gi-ilang suod nga higala, kumpare ug daw igsuon ang among pagtinagdanay.
Alang sa iyang mga kauban sa media industry dinhi sa Sugbo ug sa iyang mga taga lungsod sa Argao, dili gayod mamahimong makalimtan si Cerge gumikan sa iyang natampu.
Daghan siya og natabang sa iyang yutang natawhan. Gani daghan man ang nasubo sa iyang pagtaliwan nga wala lang damha. Bisan kon wala na si Cerge apan magpabilin gihapon kini sa ilang galamhan ug handurawan ang ngalang Cerge Remonde labi pa niadtong mga tawo nga iyang natabangan og kansang kasing-kasing iyang natandog.
[bgnalzaro@gmanetwork.com]