NANUMPA na si Kong. Celestino Martinez kang House Speaker Prosepero Nograles.
Kini human nimando ang Korte Suprema sa pagpalingkod na kang Martinez sa labing daling panahon human siya ideklarar nga mananaog sa 2007 elections.
Apan di pa mo-surrender si Kong. Benhur Salimbangon kay buot pa niyang hutdon ang legal process.
Usa sa iyang gipadayag nga kabalaka kon iyang biyaan ang puwesto mao ang mga proyekto nga iyang nasugdan nga posibleng di na hinuon mahuman.
Apan kon babagan man kini ni Martinez, di sab ni mahimong sayon nga buhat tungod kay pila na man lang ka mga adlaw ang nahabilin sa iyang pag asumer.
Mga duha ra ka semana nga session ang maapilan sa batan-ong Martinez.
Gawas niini, di sab maayo sa iyang kandidatura sa Mayo nga eleksyon ang pagbabag sa mga proyekto kay inay makaayo kini kaniya, mas makadaot hinuon.
Sa pikas bahin, mas makaayo pa kang Salimbangon ang paghatag og higayon kang Martinez sa paglingkod kay sa pag-insister nga magpabilin.
Ang pagkamapaubsanon usa ka birtud nga dalaygon kaayo.
Bisan kon giingon pang kuwestyonable alang kaniya ang pagdaog ni Martinez sa Korte Suprema, dugang puntos niya ang pagtugyan sa iyang lingkuranan ngadto sa iyang kaatbang.