SECTIONS
Saturday August 18, 2018
SUPERBALITA CEBU

Diputado: Sobra ra pod na, Cong!

SA atong nahibaw-an, normal na kaayo nga dunay 10% nga komisyon ang mga proyekto sa gobierno.

Mao na kini ang naandan nga komisyon og kasagaran nga mahitabo, apil na kini sa “business expense” sa mga kontraktor.

Gani, matod pa, dili na kini pangayoon pa kay deretso na kini nga ihatag.

* * *

Apan dunay uban nga sobra ra makapangayo.

Matod pa sa usa ka kontraktor sangko sa langit ang iyang pagmahay sa dihang miapil siya og midaog sa bidding para sa usa proyekto nga “flood control” sa usa ka lungsod.

“Tiaw bay 40% ang gipangayo ni Congressman. Unsaon pa man pag-implement aning project nga 60% na lang ang mahibilin?”

Mao kini ang sulti sa kontraktor.

* * *

“Ang uban mangayo man pero dili pod ingon ana kadako. Sobra ra pod kaayo nang gipangayo nga 40% oy,” dugang pa sa kontraktor.

Unsa may imong gibuhat, akong gipangutana ang kontraktor.

Mihatag na lang kay wa man koy mahimo, tubag niya.

Pero di na gyod ko moapil sa mga bidding diha oy, adto na lang ko sa ubang dapit, panapos sa kontraktor.

* * *

Mao diay kini hinungdan.

Sa mao gihapon nga lungsod dili pa lang dugay, dako ang kahikurat sa mga katawhan sa dihang nabungkag ang usa ka flood control project tungod sa dakong baha panahon sa bagyong Urduja.

Nabungkag ang dike og nakita sa mga katawhan ang “tinai” sa maong proyekto.

Pulos semento lang diay og walay mga kabilya nga gigamit sa maong proyekto.

Napugos tingali ang kontraktor sa maong proyekto paghimo niini tungod sa pamaagi sa Congressman nga mangayo og 40%.

Mao kini hinungdan nga huyang og dili lig-on ang maong flood control project kay walay kabilya nga gigamit sa pagtukod pa niini.

Gitabonan lang og semento ang “tinai” aron dili makita ang kahuyang niini.

* * *

Kon mao kini ang patakaran sa maong Congressman, dili ikatingala nganong sayon ra kaayo kining “nanghatag” og tag-10,000 ngadto sa tag-15,000 kada kandidato pagka-kapitan sa piniliay sa miaging semana.

Nagpatapok ang Congressman sa mga piniling kandidato og human sa iyang pakigpulong, nanghatag kini og tag-10,000 ngadto sa tag-15,000 kada usa kanila, depende sa kadaghanon sa botante.

Dako-dako ang nagasto sa maong Congressman kay daghan man nga mga kandidato ang miatender sa maong kalihokan.

Apan wala kini magsapayan kay nagplano man kini mokandidato pagka-gobernador.

Gawas pa, pinaspasan og dili man diay hinagoan ang maong kwarta nga gipanghatag.

* * *

Daghan sab ang natingala.

Dunay usa ka taas nga opisyal nga dunay proyekto nga merkado sa iyang lungsod.

Balor kini og 37 ka milyon ka pesos. Apan unsang pagka-unsaa nga wala man kini malihok sukad pa kaniadtong 2016.

Unsay hinungdan?

Dili mohimo og plano ang DPWH para sa maong merkado. Milabay na lang ang 2017, wa gihapon mahimo ang plano sa maong merkado.

Ang resulta, na-quits ang maong proyekto.

Ngano kaha nga wala man tandoga sa DPWH ang maong proyekto?

Og ngano pod kaha nga wala may nahimo ang dakong opisyal nga maoy nangamahan sa maong proyekto?

Ingon ani na lang ba gyod siya ka inutil nga sayon ra man unta siya kaayo makaduol sa presidente?


VIEW COMMENTS