TAGDUMALA sa Cebu South Bus Terminal miangkono nga ilang gikasurprisa ang hilabihan kadaghan sa mga pasahero nga nidagsa sa terminal atol sa naghinangat nga Barangay ug SK elections sa Mayo 14.
Mga pasahero nangreklamo tungod kay miabot og unom ka oras ang ilang pagpaabot sa mga bus.
Gipahibalo ni CSBT Operations Manager Joey Herrera nga moabot sa 2,460 bus trips ang natala sa terminal dihang naghinangat ang elections gikan sa Mayo 11 sa hapon.
Matod niya, anaa sa gibana-banang kapin sa 135 mil ka mga pasahero ang nidagsa sa terminal sulod sa tulo ka adlaw.
Sagad sa ingon atong gidaghanon, matod ni Herrera, nga mahitabo lang sa mga holiday sama sa Kalag-kalag ug holy week nga molungtad lang og duha ka adlaw ang pagdasok sa mga pasahero.
Bisan og dunay igong gidaghanon sa mga bus, daghan gihapong mga pasahero nga nangalangay og dugay sa pagpinaabot og ilang kasakyan.
Gawas sa grabing kalangay, gireklamo usab ang kakuwang sa tubig sa mga pansayan ug ang giingong pag-overcharge sa plitehan sa bus.
Tungod sa maong hitabo, ang CSBT management nakat-on og leksyon ug hayan ila na kining kapangitaan og solusyon ilabi na sa eleksiyon sa Mayo sunod tuig. (AZDL)