BISAN kon nanumpa na si kanhi Bogo City Mayor Celestino “Tining” Martinez atubangan ni House Speaker Prospero Nograles isip representante sa 4th district, di pa gihapon moatras si Cong. Benhur Salimbangon.
Si Salimbangon niangkon nga gi-deny ang iyang gisang-at nga motion for reconsideration mahitungod sa desisyon sa Korte Suprema nga nag-ila kang Martinez nga maoy tinud-anay nga mananaog sa 4th district.
Apan sa interview sa CCTN kagahapon sa buntag, iyang gibutyag nga wa gihapon dinhi matapos ang ilang gubat kay mosang-at pa siya og ikaduhang motion for reconsideration.
Matod ni Salimbangon nga mahimo pa silang makasang-at og dugang mga motion sama sa kaso sa League of Cities batok sa mga lungsod nga gihimong mga siyudad diin kaduha sab moduso og motion ang mga lungsod diin sa ikaduhang desisyon, sila gyud ang nidaog.
Ang pagpanumpa ni Martinez atubangan kang Nograles wa usab magpasabot nga siya na gyud ang representante sa 4th district.
Matod niya nga mobakante lang siya sa iyang posisyon kon hukman na sa Korte Suprema ang iyang ikaduhang motion.
Apan si Martinez niingon nga nagpakauwaw lang gyud si Salimbangon nga mamugos gihapon sa pagpabilin sa katungdanan bisan kon ang labawn’ng hukmanan nay nidesisyon nga siya pabiyaon na sa iyang posisyon.
Niadtong Miyerkules sa gabii nanumpa si Martinez atubangan kang Nograles ug karon nisusi na usab sa Kongreso kon duna pa siyay magamit nga pundo alang sa mga proyekto sa 4th district.(CPL)