GIKATAHONG hatagag pasidungog ang namatayng Sugboanong si Press Secretary Cerge Remonde kagahapon sa Order of Lakandula nga may ranggo nga Grand Cross o Bayani.
Kini usa sa mga labing taas nga pasidungog nga ihatag sa kagamhanan sa Pilipinas ngadto sa usa ka Filipino o kaha langyaw.
Si Pres. Gloria Macapagal-Arroyo gitakdang motunol sa pasidungog kagahapon sa pag-abot sa haya ni Remonde sa Malacañang Palace.
Ang lawas ni Remonde ibalhin ngadto sa Malacañang sa Heroes’ Hall gikan sa Heritage Park, Taguig City kagahapon sa hapon.
Matod ni Press Undersecretary Butch Junia nga karong alas 11 sa buntag moabot ang lawas ni Remonde sa Sugbo.
Sugaton siya pinaagi sa arrival of honors nga tambungan nilang Lapu-Lapu City Mayor Arturo Radaza uban sa mayor sa iyang lungsod nga natawhan nga si Argao Mayor Edsel Galeos diha sa Mactan-Benito Ebuen Air Base.
Nitataw si Junia nga human sa seremonyas, idiretso gilayon ang iyang lawas sa Malacañang sa Sugbo.
Magsugod ang public viewing mga alas dos pasado karong hapon hangtod na kana sa alas nuybe sa buntag ugmang adlawa.
Iyang gitumbok nga adunay ipahigayon nga mga misa sugod usab karong hapon nga ang unang mopahigayon niini ang grupo sa Associated Labor Unions (ALU) nga dugay usab nga gialagaran ni Remonde. Ang dyLA nga ubos sa ALU dugay nga gialagaran sa kanhi Press Secretary.
Bilaran si Remonde og usa ka gabii una pa siya dad-on sa Argao ugma.
Adto siya ipahiluna sa Pres. Diosdado Macapagal Gymnasium dayon sa Dominggo ilubong siya sa Remonde family mausoleum sud sa Argao Public Cemetery mga alas tres sa hapon.
Si Cebu Provincial Police Director Erson Digal niingon nga nangandam na sila alang sa seguridad.
Iya nang gisusi ang lungsod sa Argao kagahapon ingon man ang dapit nga lubngan ni Remonde.
Siya nibutyag nga padad-an nilag reinforce-ment ang mga pulis sa Argao nga gikan sa CPPO ug 78th Infantry Battalion sa Philippine Army. (JECT/DRT)