PATAY nang niabot sa tambalanan ang 6-anyos nga batang babaye nga gituohang aksidenteng napusilan pasado ala una sa milabayng hapon sa sityo Balaw, Barangay Sudlon 2, bukiran nga barangay sa siyudad sa Sugbo.
Ang biktima giila sa kapulisan nga mao si Mary Joy Responde, anak sa magtiayong mga mag-uuma.
Ang biktima dunay samad sa tuo nga bugan ug tiyan.
Ang entry sa bala gikan sa ubos padung sa ibabaw hinungdan sa pagkahabwa sa tinai sa bata, matod ni Dr. Nestor Satur sa PNP Crime Laboratory nga ni autopsy sa lawas.
Sa pasiuna nga imbestigasyon sa mga sakop sa Homicide Section nagbutyag nga naglakaw ang amahan sa biktima nga si Julian Responde, 57, gikan sa barangay hall kay nagbayad sa bayranan sa kuryente.
Apan sa dihang anaa na siya duol sa ilang balay, nakadungog siya og buto sa armas de fuego.
Gisugo ni Julian ang iyang pag-umangkon sa pagsusi sa gigikanan sa buto tungod sa iyang kabalaka.
Daling nidagan ang iyang pag-umangkon, apan nibalik kini sa agi nga nagkugos sa kinamanghurang anak sa magtiayong Responde nga may samad na.
Daling gidala sa amahan ang iyang anak paingon sa Cebu City Medical Center (CCMC), apan pag-abot sa tambalanan gideklarar nga dead on arrival.
Sila si SPO3 Rey Cuyos, PO2 Michael Cudaste ug PO1 Nilo Aventurado sa Homicide Section ning-adto kagahapon sa bukid aron sa pagsusi, matod ni PO3 Julius Mabunay.
Matod ni Mabunay nga wa pa gyud masuta sa iyang mga kauban kinsa ang nakapusil sa bata kay way nakakita atol sa hitabo.
Apan posibleng homemade shotgun o pugakhang ang nakaigo sa bata tungod sa shotgun pellets nga nakuha gikan sa tiyan sa biktima.
Matod ni Mabunay nga ang inahan nga nahabilin sa balay niadtong higayuna wa sab maestorya og tarong sa iyang mga kauban kay maglisod kini sa pagsulti tungod sa sakit resulta sa iyang pag-anak sa biktima, kinsa giingong ikawalo ug kamanghuran sa magsuon.
Apan si Satur nagtuo gyud nga aksidente ang pagkapusil sa bata tungod sa entrada sa samad nga nagagikan sa ubos sa lawas.
“Posible gyud na,” nagkanayon si Satur sa interbyu sa Sun.Star Superbalita.
Matod niya nga nakakuha siyag shotgun pellets gikan sa tiyan sa biktima nga nababha hinungdan sa pagkahabwa sa tinai.