BAG-OHAY lang ta nakauli sa dakbayan sa Davao gikan sa Marikina City diin gipahigayon ang 6th PSC PHILS PADA National Para Games didto sa Marikina Sports Center.
Atong gidayeg ang mga Persons with disability gikan sa dakbayan sa Davao nga gipadala sa lokal nga gobyerno aron makigtigi sa natad sa paugnat sa kusog nga sama kanila nga dunay kakulian sa ilang lawas, mga representante gikan sa tibuok nasud.
Daghan ang nahingangha sa ilang pagtan-aw sa mga atleta kay daw dili kasaligan apan ilang gipakita nga kon mahimo sa normal nga tawo mahimo sab nilang buhaton sama sa pagdula og chess sa mga buta, bowling, lumba dagan sa mga buta, paglangoy sa mga pungkol ang tiil ug kamot, basketbol nga sakay sa wheelchair ug uban pa nga mga dula.
Nagkadaghan ang miapil karong tuiga kay sa milabay nga katuigan kay dili na ikaulaw sa mga PWD nga mopakita sa publiko sa ilang kahimtang inay nga magtago ug magpalayo sa katilingban.
32 ka mga atleta ug coaches ang nagrepresenta sa atong dakbayan, gisuportahan sa gobyerno sa ilang plite sa eroplano padulong ug pabalik ug gihatagan sa ilang allowance sa pagkaon sulod sa 10 ka adlaw. Ubang mga dakbayan wa makapadala sa ilang atleta nga nagpakita sa ilang kakulang sa pagtagad sa mga PWD.
Garbo sa taga Davao nga nakahakot og 14 ka gold medal, 6 ka silver ug 2 ka bronze. Daw dili katuohan apan maoy tinuod nga nahimong gold medalist sa dulang bowling usa ka buta nga taga Davao. Mihimo og strike ug sphere sa mga borilyo sa iyang paglabay sa bola.
Siya si Jonathan Español. Sa atong Facebook account nga Seth delos Reyes akong gi-post ang iyang pagpasalamat kang Mayor Inday Sara Duterte Carpio sa suporta sa gobyerno kanila nga nga PWD uban sa mga medalist sa maong torneyo. Si Cres Alfante, usa ka buta, gold medal sab ang nakuha uban kang Ian Nakila sa dulang shotput.
Pabilin nga kampeyon si Smith Billy Cartera, usa ka polio victim sa table tennis.
Wa man makadaug ang uban kanila apan sila nakigbisog alang sa kadungganan sa atong dakbayan sa Davao.
Sa tinuod, daghan pa ang kagamitan nga wala sa atong mga PWD gani man manghulam pa sila og mga gamit sa ubang taga Mindanao sa ilang pag pakigharong sa mga taga Luzon labi na ang mga sakop sa Philippine Team apan dili masukod ang ilang kalipay sa pagsalmot diin ilang napakita unsa ang pagtagad sa atong gobyerno kanila.
Natandog ko sa sulti sa usa ka buta nga bisan sa iyang sitwasiyon nakigtigi iyang gihatag ang iyang makaya kay mao lang ang iyang paagi nga makatampo aron makahatag og dungog sa atong dakbayan. Ikaw unsa man ang imong tampo?