BAYENTE kwatro ka mga migradwar sa kursong education gikan sa Davao Region ang mitugpa sa Top 10 sa elementary ug secondary level sa 2018 Licensure Examination for Teachers (LET) nga gihimo niadtong Marso 25, base sa resulta nga gipaguwa sa Professional Regulation Commission (PRC) kagahapon, Mayo 23.
Sa maong ihap, dunay 15 ka mga migradwar gikan sa University of Southeastern Philippines (Usep), managsamang gikan sa Davao ug Tagum City; pito gikan sa University of Mindanao (Davao, Tagum ug Peñaplata); usa gikan sa Holy Cross of Davao, ug usa gikan Cor Jesu College (Holy Cross of Digos).
Sa LET Elementary Level, si Diane Opeña Barbarona sa Usep-Tagum maoy ikaupat nga dunay passing rate nga 87.8%; Abigail Ortega Diamante sa Usep-Tagum ug Honelyn Batislaong Dolores gikan UM-Tagum ikalima nga dunay 87.6%; Noel Villacomba Bernadas sa UM-Tagum ikaunom nga dunay 87.4%; sa ikapito mao si Shereyl Coto Samocino gikan Holy Cross of Davao College nga dunay 87.2%; Loren Priagula Sangco gikan Usep-Tagum ug Jane Gammad Yu gikan Usep-Davao City ikapito nga dunay 87%; Lady Mae Calvo Genosas gikan Usep-Tagum ikasiyam nga dunay 86.80%; ug Sheila Marie Sumatra Casas sa Usep-Tagum ug Jessa Estrera Yaun sa UM-Peñaplata ikanapulo nga dunay 86.60%.
Sa LET Secondary Level, si Jireh John Baquiran Arebe sa Usep-Tagum ikatulo nga dunay 92%; ikaupat si Kim Torrenueva Dodongan gikan Usep-Tagum nga dunay 91.80%; Rendie Crausos Bedolido gikan Usep-Tagum ikalima nga dunay 91.60%; ikaunom nga dunay 91.40% sila Ian Val Felicilda Cabel gikan UM-Davao City ug Medelyn Butron Pepito gikan Usep-Tagum; ikapito nga dunay 91.20% sila Cleford Jay Dayon Bacan gikan Cor Jesu College (Holy Cross of Digos) ug Vincent Molos Rafols gikan Usep-Tagum; nagbahin sa ikawalo nga dunay 91% sila Joan Caman Casas gikan UM-Tagum ug Shalimar Pedroso Dolar ug Juvielle Icoy Valdez, managsamang gikan sa Usep-Tagum; ug Ivy Baco Balaquinto gikan Usep-Davao City, Jimvelle Concon Faustor gikan Usep-Tagum, ug Jeric Lumba Telen ug Raymart Villareal gikan UM-Davao City naa sa ikanapulo nga dunay 90.60%.
Dunay 13,774 o 23.62% sa 58,323 mikuha sa pasulit ang mipasar sa elementary level samtang 22,936 o 29.91% sa 76,673 mikuha sa pasulit ang mipasar sa secondary level.
Nanguna sa LET Elementary si John Michael Tagayon Dela Paz sa University of the Philippines-Diliman nga dunay 88.8% samtang si Kier Araula Baugbog sa Pamantasan ng Lungsod ng Valenzuela nanguna sa secondary level nga dunay 92.4%. (JCR)