SECTIONS
Saturday August 18, 2018
SUPERBALITA DAVAO

2 Cafgu nagtagay sa pista, gipatay

MONTEVISTA, Compostela Valley -- Patay ang duha ka mga miyembro sa Citizen Armed Forces Geographical Unit (Cafgu) human gipusil didto sa Purok 3, Barangay Camansi, alas 11:00 sa buntag, Martes.

Mga biktima giila nga mao si Daniel Angog, 40, minyo ug ang iyang pag-umangkon nga si Jeffrey Angog, 39, minyo, nagpuyo sa Purok 3, Barangay Camansi, Montevista.

Base sa taho gikan sa Compostela Valley Police Provincial Office nakadawat og tawag ang Montevista Municipal Police Station gikan ni Joselito Abuceju sa Barangay Camansi kinsa nagpahibalo sa insidente.

Miguwa sa imbestigasyon nga ang mga biktima nag-inom atol sa selebrasyon sa pista sa barangay.

Apan upat ka mga armadong lalaki ang mibutho ug gibaklid ang mga biktima ug pugsanong gidala ngadto sa ngilit nga lugar.

Pipila ka minuto ang milabay, nabati sa mga molupyo ang sagunson nga buto sa pusil.

Dihang gisusi, nabangalan ang mga biktima nga nagbuy-od ug wala nay kinabuhi, 150 metros ang gilay-on gikan sa lugar diin sila nag-inom.

Mga suspek paspas nga misibat paingon sa wala matinong direksiyon.

Narekober gikan sa dapit sa nahitaboan ang 20 ka basiyo sa bala sa M16 Armalite rifle ug usa ka basiyo sa bala sa 7.62mm nga pusil.

Gidason sa taho sa kapulisan nga mga biktima aktibong miyembro sa Cafgu, ubos sa 72nd Infantry Battalion, Philippine Army nga nadestino sa Patrol Base sa Barangay San Vicente, Montevista.

Ang mga patay'ng lawas sa biktima gidala ngadto sa Lord Anthony Funeral Parlor alang sa otopsiya.

Usa sa mga anggulo nga gilantaw sa kapulisan ang trabaho sa mga biktima.

VIEW COMMENTS